Read Northern Rengma Naga BVÜKESHHU 37 Bible Online

BVÜKESHHU 37 - Northern Rengma Naga bible

BVÜKESHHU 37

¹Bezalel na akakia chan pi Cenkethenjüh Khitson ma kesie sentimeter 110, keti sentimeter 66, nu kemisi senti- meter 66 tsüti saya.

²Ma suna kemetha pi ma non, ma mei, nu ma katen tsüdila meju kevüliya.

³Ma tsü kepieji suna qei mejü saya, nu tsüthu pi ma ccü mejü wi chiya, qei kenini pi pahan pahan wi chi.

⁴Ma akakia chan pi tsü kepieji sa nu suna pi tsüthu mejuya,

⁵nu tsüthu pi Akhitson miwi ma qeithu wi tsü ghe chiya.

⁶Ma suna tsen kemetha pi ma keshan kesie sentimeter 110, nu kemeza sentimeter 66, saya.

⁷Ma suna pi cherubim tsi keni cühya,

⁸kesüsü pi ma katen ghapeli wi chile kesalina. Tsü keni pi ma keshan miwi zhüghu pi kesütan sa thsü.

⁹Cherubim tsüna ma keshan miwi kaghangli nu manyi gisha zanshigü pi tsü whengbhon yathsü.

¹⁰Ma akakia chan pi miz kesü ma kesie sentimeter 88, kemeza sentimeter 44, nu kemisi sentimeter 66, tsüti cühya.

¹¹Ma suna tsen kemetha pi tsü mejuya nu pi ma katen la meju kevüliya.

¹²Ma füghancü kesa kesü ma kemeza milimeter 75, saya nu suna pi tsü ma katen meju kevüliya.

¹³Ma tsü kepieji suna qei mejü sapi ma ccügwen mejü wi ma ccü keben pen witsü chi.

¹⁴Miz kepieji pi chile kesa qeithu tsüpi füghancü kesa kete wi chi.

¹⁵Ma kepiejithu tsü akakia chan pi sa nu suna pi tsüthu mejuya.

¹⁶Ma suna tsen pi miz wi kesen hyikhu sa; akhu, ahyi, afü, nu akhuzzathu kisengtssü pi kekinyi kesa wi senle kesalina.

¹⁷Ma suna tsen pi ahula kedonpen saya. Ma suna pi ma donbvü nu ma kukhi cühya; ma tsikesa thighethu, kebvüjjen, nu ma tsangthu pi tsü zhüghu pi kesütan sa thsü.

¹⁸Ma cüna tugho na ma katen ghapeli kechengcheng chang waben.

¹⁹Ma cüna tugho qho kesüsü wi tsikesa thighe kecheng tsüna mcüshüli thighe kebvüjjen nu ma tsangthu saghu pvü keben tsi ti kesa.

²⁰Ahula kedonpen kukhiwa wi tsikesa thighe mejü tsüna mcüshüli thighe kebvüjjen nu ma tsangthu saghu pvü keben tsi ti kesa.

²¹Ciwi kebvüjjen kesü na ma cüna kechengcheng keni cakhu wi ben.

²²Kebvüjjen, ma cüna, nu ahula kedonpenthu tsü suna tsen pi cüghu pi kesütan saya.

²³Ma ahula kedonpen tsü ghena ahula tagü saya, nu kemecangqae nu ma khala kechipen tsü suna tsen pi saya.

²⁴Ma ahula kedonpen nu tsü tsanqaithu tsüdi kesa ghena suna tsen kilogram 35, sen.

²⁵Ma akakia chan pi hankedemvu mecang pi kekinyipen kesü saya. Tsü ketikesie meceqe, kesie sentimeter 45, kemeza sentimeter 45, nu kemisi sentimeter 90, saya. Ma ccügwen mejü wi ma ghacüthu tsü zanghu pi kesütan saya.

²⁶Ma suna tsen pi ma shoni, ma ccügwen mejü, ma ghacüthu, nu ma katen meju kevüliya.

²⁷Ma suna pi ma kepie qei keni saya nu pi ma cakhu wi ma katen ghapeli chiya nu ma kepieji pi chi nu pieya thsüle saya.

²⁸Ma akakia chan pi kepiejithu sa nu suna pi tsüthu mejuya.

²⁹ Ma kenyenji deli kemetha la saya, nu hankemehai pi saghu pi hankedemvu saya.