Read Northern Rengma Naga BVÜKESHHU 38 Bible Online

BVÜKESHHU 38 - Northern Rengma Naga bible

BVÜKESHHU 38

¹Mecang pi kekinyi ghena, ma akakia chan pi kekinyipen kesü saya. Tsüna ketikesie meceqe, kesie meter 2.2, kemeza meter 2.2, nu kemisi meter 1.3 saya.

²Ma accügwen mejü li wi tsü ma ghacüthu sa, isanu kekinyipen tsü zanghu pi kesütan saya. Ma lezza pi tsü mabenla mejuya.

³Ma kekinyipen ghena atsanqai tsüdila saya: kennunpfü, akhu magi keben, akhuzza, ametsi ketsuwa, nu anni khu. Atsanqai ha tsüdila lezza pi saya.

⁴Ma lezza pi anyagha kesü saya nu tsüpi kekinyipen füghancü kesa cakhu wi chi nu tsü yala kekinyipen gishü pahan cuya thsü.

⁵Ma kepie qei mejü saya nu pi ma ccügwen mejü wi chi.

⁶Ma akakia chan pi ma kepieji saya nu lezza pi mejuya,

⁷nu kekinyipen tsü piele kesa wi tsüthu tsüpi ma qei kesüsü wi ghechi. Kahachan pi kekinyipen tsü sa nu ma non wi kaghacang sa theng.

⁸ Ma Apvüwa ketenpen Nithsüjjen kedulen wi nza na kekuli sa ketenthu ji ayena lezza pi kwenkemetsikhu nu ma kedonpen kesü saya.

⁹Apvüwa ketenpen Nithsüjjen tsü ghena ma linen kemehai pi shon kevülithsü saya. Acülawa keshonthsü na ma kesie meter 44,

¹⁰nu rükatssü pi adhasü nu zenza kebhenji sa ketheng tsüpi lezza pi kesa zenza ngwe nu ma donbvü ngwe sapi tsü tsükiya.

¹¹Tsüti aghawa keshon la makesü saya.

¹²Niduwa keshonthsü na ma kesie meter 22, azenza tagha nu ma donbvü tagha, nu rükatssü pi kesa adhasü nu kebhenji saya.

¹³Nishuwa kedulen wi keshonthsü na ma kemeza meter 22, saya.

¹⁴Kedulen wi ghapeli qho wi keshonthsü meter 6.6, azenza kecheng nu ma donbvü kecheng.

¹⁶Keshonthsü tsüdila linen kemehai pi saya.

¹⁷Azenzathu donbvü tsüna lezza pi sa, nu adhasü, kebhenji, nu azenza shoni kemejuthu tsüna rükatssü pi saya. Shon kevüli zenza tsüdila rükatssü ssüli pi sa.

¹⁸Keshondhi kedulen keshonthsü tsüna linen kemehai atsena, nmiepheü, nu ssenthsü kenmie pi de nu ayakhu ketheng pi saya. Tsüna ma keshondhi keshonthsü ti kesie meter 9, nu kemisi meter 2.

¹⁹Azenza mejü pi ma donbvü miwi na tsü tsüki theng. Ma adhasü, kebhenji, nu ma shoni wi kemejuthu tsü rükatssü pi saya.

²⁰Anithsüjjen ghena kejetenji nu ma keshonthu tsüdila lezza pi saya.

²¹Hawa ha alonpha keni miwi Ayenkhukechithu Tagha pi zhü ketheng tsüpi chi ketheng Apvüwa ketenpen Nithsüjjen wi kesen mighe tsanqaithu. Ha Mosa na khi kechi wina Levi nyithu keqhaikedi Aaron tsawa Ithamar kekhu wi kekulithu na saya.

²²Judah mizza wi Hur tsawa Uri tsa Bezalel na Apvüwa khi kechi tsüdila saya.

²³Ma kekiqawa na Dan mizza wi Ahisamakh tsa Oholiab, anyonsu kepvüwa, ajikujuwa, nu linen kemehai atsena, nmiepheü, nu ssenthsü kenmie de ketenwa.

²⁴Kemetha Nithsüjjen ghena suna satemetha pi Apvüwa wi kechi tsüdila kilogram hazar kesü, tsüna tsü tsüwi apisa men kenie wina.

²⁵ Anyithu nyanzhüghu wi rükatssü mukeya 3,430 kilogram, tsüna tsü tsüwi apisa men kenie wina.

²⁶ Nyanzhüghu wi zhüya kesathu tsüdila apisa ha meceqe pi chi, anyi kesüsü tsü tsüwi apisa men kenie wina pi chi. Ciwi nyanzhüghu wi kahang mapi ngwe nu tsüna ameiwa zhükeya na anyi 603,550.

²⁷Kemetha Nithsüjjen nu keshonthsü donbvüthu meza kesa ghena rükatssü 3,400 kilogram sen, ma donbvü kesü kesa wi 34 kilogram sen.

²⁸Bezalel na rükatssü 30 kilogram sen nu zenzathu ghena kebhenji, adhasü, nu ma shoni kemejuthu sa.

²⁹Lezza satemetha pi Apvüwa wi kechi na 2,425 kilogram.

³⁰Ma tsü sen nu Apvüwa ketenpen Nithsüjjen wi kedulen donbvüthu, lezza pi kesa kekinyipen nu ma nyagha, nu kekinyipen wi atsanqaithu tsüdi,

³¹shon kevüli ketheng kevü nu kedulen keshon donbvüthu, Nithsüjjen nu ma shon kevüli wi kevü kejetenji tsüdila saya.