Read Northern Rengma Naga BVÜKESHHU 39 Bible Online

BVÜKESHHU 39 - Northern Rengma Naga bible

BVÜKESHHU 39

¹Mathu atsena, nmiepheü, nu ssenthsü kenmie pi kemetha thsümeni saya nu keqhaikedithu na Kemetha Pen wi kekuli kesa wi pvü thsüle kesalina. Apvüwa na Mosa wi khi kechi ti mathu Aaron ghena keqhaikedi thsümeni saya.

²Mathu linen kemehai; atsena, nmiepheü, nu ssenthsü kenmie, nu sunali pi adepfü kewhengthsü sa.

³Mathu na tsü sapi linen kemehai; atsena, nmiepheü, nu ssenthsü kenmie wi chile kesalina suna pha ghapasi cühya nu dendhi pi ma li saya.

⁴Mathu adepfü kewhengthsü ghena ali keni saya nu pi ma katen ghapeli wi misüki khvu sa.

⁵Apvüwa na Mosa kekiza ti mathu na atsanqai tsü makesü pi ageshi keqhan mehaitsü degüya nu pi adepfü kewhengthsü wi misüki pi kesütan sa thsü.

⁶Mathu karnelian lonthu tsü kiden-kesha pi suna tsü vüya; mathu sapichü ntsa sa nu Jakob tsa taghakeni nyan pi ciwi zhükiya.

⁷Apvüwa na Mosa kekiza ti mathu na tsüthu pi Israel mizza taghakeni mithon wina adepfü kewhengthsü miwi chi.

⁸Mathu na adepfü kewhengthsü kesa wi kesen atsanqaithu nu ayakekhu makesü sala adeshi keqhan saya.

⁹Tsüna ketikesie meceqe, kesie sentimeter 22, kemeza sentimeter 22, sa nu shen pi keni saya.

¹⁰Mathu alon menkedhu alen mejü sapi tsü vüya; len atuwa wi rubi, topaz, nu garnet;

¹¹len keniwa wi emerald, safir, nu diamond;

¹²len kechengwa wi turquois, agat, nu amethist;

¹³len mejüwa wi beril, karnelian, nu jasper tsüti saya. Hathu ha pi tsü mi zhüten pi ma tsisa theng.

¹⁴Alon taghakeni ha kesüsü miwi Jakob tsa nyan kesüsü zhüya nu pi Israel mizza mithon saya.

¹⁵Adeshi keqhan ghena mathu sunali tsen sapi kemejüliya.

¹⁶Mathu suna khang keni nu suna qei keni saya nu qei keni tsüpi adeshi keqhan ccügwen meiwa miwi tsü chiya.

¹⁷Mathu sunali keni tsüpi ma qei keni wi misükiya,

¹⁸nu sunali keni ma shi pahanwa tsüpi ma khang keni wi tsü khünkiya, tsüti nu tsüpi adepfü kewhengthsü atuwa misükiya.

¹⁹Mathu suna qei keni sapi adeshi keqhan ccügwen ssanwa adepfü kewhengthsü ketsaki katen miwi chiya.

²⁰Mathu hela suna qei keni saya nu pi adepfü kewhengthsü keni atuwa ma shi ageshi keqhan mehaitsü degü ketheng ketsaki miwi tsü chiya.

²¹Apvüwa na Mosa kekiza ti mathu na atsenali pi adeshi keqhan nu adepfü kewhengthsü qeithu tsü khünghu, isanu adeshi keqhan tsüna ageshi keqhan miwi ben nu nkeqhu thsüla.

²²Adepfü kewhengthsü miwi pongca keben agwomejuwa kaghazu tsü mabenla ssenthsü atsena pi saya.

²³Ali ku tsü qae nwa thsüle kesalina athsü kezü pi jekevüliya.

²⁴Apvüwa na Mosa kekiza ti ma katen ssanwa maben wi tsü suna tsen pi ahhibvü kuti wina linen kemehai; atsena, nmiepheü, nu ssenthsü kenmie pi ma tsanzü mighe sa kevüliya.

²⁷Mathu na Aaron nu ma tsathu gwomejuwa sa,

²⁸ali kemejuthsü, aliwen, linen patono kenkhangwa,

²⁹nu linen kemehai; atsena, nmiepheü, nu ssenthsü kenmie pi alaweng keqhan sa nu ayakhu pi ma tsi saya, tsüna Apvüwa na Mosa kekiza ti sa.

³⁰Mathu suna tsen pi tsü tsisa nu satemetha kesa zensu “Satemetha pi Apvüwa cüdha” hapi ma miwi jenkiya.

³¹Apvüwa na Mosa kekiza ti mathu na atsenali pi tsü misüki pi ali kemejuthsü atuwa misükiya.

³²Apvüwa ketenpen Nithsüjjenwa wi tsü kekuli tsüdila sacenya. Apvüwa na Mosa kekiza ti Israel nyithu na tsüdila saya.

³³Mathu na hathu ha sen nu Mosa wi gho: Anithsüjjen nu ma tsanqaithu tsüdi, ma dhasü, ma khuki, ma kenthsüchan, ma zenza, nu ma donbvüthu;

³⁴ma keshan aneni hyu ghang pi nmieni kesa, ma keshan asahyu kemehai pi kesa, keshonthsü;

³⁵alonpha keni na ma non wi keben Cenkethenjüh Khitson, ma kepieji, nu ma keshanthu;

³⁶miz nu ma tsanqaithu tsüdi, nu amesa pi Anyiza kinyi kesa;

³⁷suna tsen pi kesa ahula kedonpen, ma hula, ma tsanqai tsüdi, nu ahula ghena deli;

³⁸suna pi kesa kekinyipen, kenyenji deli, hankedemvu; Nithsüjjen wi kedulen keshonthsü;

³⁹lezza pi kesa kekinyipen nu ma nyagha, ma kepieji, nu ma tsanqaithu tsüdi; kwenkemetsikhu nu ma donbvü;

⁴⁰shon kevüli keshonthsü, ma zenza nu ma donbvüthu; shon kevüli kedulen keshonthsü, nu ma ssülithu; Nithsüjjen kejetenji, ciwi kesenji tsanqaithu tsüdi;

⁴¹nu Kemetha Pen wi kepvüji keqhaikedithu thsümeni kemethathu tsü — keqhaikediwa Aaron nu ma tsathu ghena thsümeni kemethathu.

⁴²Apvüwa na Mosa kekiza ti Israel nyithu na kekuli tsüdila saya.

⁴³Mosa na pala tsüdi ghang wa nu mathu na tsüdi wila Apvüwa na khi kechi ti sa ketheng muya. Tsalina Mosa na sawegü pi mathu cüa.