Read Northern Rengma Naga BVÜKESHHU 6 Bible Online

BVÜKESHHU 6 - Northern Rengma Naga bible

BVÜKESHHU 6

¹Apvüwa na Mosa wi khi, “Hi khili kadimiwa miwi mangwa sa chiten khe no muyaben. Hi ma meten pi inyithu ya bvü thsüaben. Hi ma meten pi ma yyi wina mathu jügüshiaben.”

² Anyiza na Mosa ccüneng nu khi, “Hi Apvüwa.

³Hi Kekhang ntsawa Nyiza sala Abraham, Isak, nu Jakob tuwi gho, isala inyan kemetha Apvüwa[5] le tsüpi mathu nchü thsü.

⁴Hi mathu ssinu cenkethenjüh sa, nu mathu na asangthu sala kahang yyi Kanaan yyiwa tsü la pi mathu cüle ijüh khuchidha.

⁵Hi khili Israel nyithu na Ejipt nyithu nssümagha sala ghadhi keben zayadha, nu hi cenkethenjühwa tsü meshenben.

⁶Tsalina Israel nyithu wi hi mathu wi khiben le kizalo, ‘Hi Apvüwa, hi nthu khushiya nu Ejipt nyithu kwen wi nssümagha sa keben wi nthu lishachi cüaben. Hi kekhang kwen na kemeten-kemesha qhethiketen kesa sengho mathu miwi chi nu nthu hangshaya ben.

⁷Nthu pi inyi saya nu hi nthu Nyiza saben. Hi Ejipt wi nthu nyu nssümagha sa keben wina nthu lishachi cü lethu nthu na hi Apvüwa nthu Nyiza kesa chüyaben.

⁸Hi nthu ssi wa ayyi pi Abraham, Isak, nu Jakob cüle khishi ketheng witsü chicü nu tsüpi nthu ji saya thsüaben. Hi Apvüwa le.’ ”

⁹Mosa na ha khipi Israel nyithu kiza, isala mathu na ma jüh nkina, kepaghenanye mathu nyu nssümagha kesa wi agüccü ntsa sa nu accükwenshü kesalina.

¹⁰Tsaseng wi Apvüwa na Mosa wi kiza,

¹¹“Wala Ejipt kadimiwa wi ma yyi wina Israel nyithu ya bvü thsü nsathu yishü le kiza chilo.”

¹²Tsalina Mosa na khineng, “Israel nyithu cükhala ijüh nkina lethu khatinu kadimiwa na ijüh kinaya mehai nu? Hi ajühkhi kemehai nyi nye le.”

¹³Apvüwa na Mosa nu Aaron manyi kizachi, “Wala Israel nyithu nu Ejipt kadimiwa wi kiza chilo, hi nshinyi kesun pi Ejipt wina Israel nyithu ssishhu thsüaden.”

¹⁴Jakob tsa tssütsewa Reuben na atsa mejü ben: Hanok, Pallu, Hezron, nu Karmi; mathu mizza pi mathu myi nyan ci.

¹⁵Simeon na atsa tugho ben: Jemuel, Jamin, Ohad, Jacin, Zohar, nu Kanaan nyi wubvü tsawa Shaul; mathu mizza pi mathu myi nyan ci.

¹⁶ Levi na atsa kecheng ben: Gershon, Kohath, ni Mirari; mathu mizza pi mathu myi nyan ci. Levi na amapi 137 hang.

¹⁷Gershon na atsa keni ben: Libni nu Shimei, nu manyi na atsanga kejon ben.

¹⁸Kohath na atsa mejü ben: Amram, Izhar, Hebron, nu Uzziel. Kohath na amapi 133 hang.

¹⁹Mirari na atsa keni ben: Mahli, nu Mushi. Hathu hana Levi shi wina keshhugho nu mathu shicüthu.

²⁰Amram na ma ba tssüggüwa Jokhebed yaya nu ma Aaron nu Mosa manyi pvügha cü. Amram na amapi 137 hang.

²¹Izhar na atsa kecheng ben: Kora, Nefeg, nu Zikrei.

²²Uzziel la atsa kecheng ben: Mishael, Elzafan, nu Sithri.

²³Aaron na Amminadab nga Nashon tssüggüwa Elisheba yaya nu ma Nadab, Abihu, Eleazar, nu Ithamar, pvügha cü.

²⁴Kohath na atsa kecheng ben: Assir, Elkana, nu Abisaf: mathu na Kora shi kegishü pahan baqhaithu.

²⁵Aaron tsa Eleazar na Puthiel nga kesü yaya nu ma Fineha pvügha cü. Hathu hana Levi mizza nu mathu shi wi alikesathu.

²⁶Aaron nu Mosa manyi wi Apvüwa na hati khi, “Israel mizzathu tsü Ejipt wina ssinu shhulo.”

²⁷Manyi na Ejipt kadimiwa wi Israel nyithu lisha chi cülo kiza.

²⁸Apvüwa na Ejipt yyi wi Mosa keccüneng wi

²⁹ma khi, “Hi Apvüwa. Hi pi no kekiza tsüdi khi pi Ejipt kadimiwa kizalo.”

³⁰Isala Mosa na khineng, “Hi ajühkhi kemehai nyi nye kesa tsü no chüben; isathu khatinu kadimiwa na ijüh kinaya mehai nu?”