Read Northern Rengma Naga JOB 1 Bible Online

JOB 1 - Northern Rengma Naga bible

JOB 1

¹Ciwi anyi kesü ma nyan Job na ben nu Uz[1] yyiwi hangden, ma Anyiza kinyi nu ma tuwi atsentsa saden. Ma anyi kemehai kesü nu nkemehai mangla nsale kesa kiden-kesha keten nyi.

²Ma atsa tagü nu anga kecheng ben,

³nu khaghaneni hazar tagü, sunsiesa hazar kecheng, amesü hazar kesü, nu gada meza manga ben. Ma amaghathu kejon na ben, nu nishuwa wi anyi keban ntsa sa.

⁴Job tsathu na kemishu kesüsü sapi kedali, nu tsüti kesa wi anyi kepathu la gho, nu mathu na keshüthangla mathu tssüggü kecheng tsü cipi mathu gweghe den.

⁵Job na kemishu kesüsü kesa sengwi aghanen tsüdi shagha ahhansha kesa khuchi nu ma tsangathu kesüsü sametha den. Ma tsüti sa, kepaghenanye ma kemeshen na ma tsangathu na nkechü wi Anyiza nkenen sa nu sami thengla benle saden.

⁶ Khathansha tangwi nyithu[2] na Apvüwa tuwi gho khe Satan[3] na ciwi mathu jawi ben.

⁷Apvüwa na ma keü, “No mangwa kuli gho ben nu?” Satan na luneng, “Hi kahe wi cüshu sen nu ayyiwi keqoe kevüli ghoben le.”

⁸Apvüwa na ma keü, “No imaghawa Job cüki chüben ma? Ayyi miwi anyi kesütanla ma ti aleben tsentsa kesa kemehai nmi. Ma hi kinyiden, nu nkemehai mangla nsale kesa kiden-kesha tenle.”

⁹ Satan na khineng, “Job na tsü ghena mangla mu meya lethu ma no kinyi kesala nye nu?

¹⁰No keshüthangla ma nu ma theghi nu ma keben tsüdi khwe ghoben. No ma kekuli tsüdi wi sawegü cü, nu no amesüsi kejon pi ma cü nu diyyi maben pongya thsü.

¹¹Isala keujüla no ma keben tsüdi khuya lethu, ma no kishen cüaben!”

¹²Apvüwa na Satan wi khi, “Isalethu, ma keben tsüdila pi no kemeshen sa nanlo, isala no Job patena yishü.” Isanu Satan na bvüa.

¹³Ghanan kesü Job tsangathu na atsa tssütsewa jjenwi kemishu kesü sa keben wi,

¹⁴nyilo kesü na bvü sen nu Job wi gho. “Ithu na amesüthu ssi sen nu allica nu gadathu na amou kete wi keben.

¹⁵Sabea nyithu [4] na gho ssikaghashen nu tsüdi zan sen nu bvüle. Mathu na nmaghathu tsüdi pathia nu hi ketan sadha. Hi ketan bvüya nu gho no kizaben le.”

¹⁶Ma tsü npi khishala amagha kepa kesü gho nu khi, “Atsanphagha na khaghanenithu nu tsüthu kehiethu ghunthidha. Nu hi ketan hangya nu gho no kizaben le.”

¹⁷Ma tsü npi khishala amagha kepa kesü gho nu khi, “Khaldea nyi [5] kaghanfüzi kecheng na ithu ssikaghashen nu sunsiesa tsüdi ssibvüdha, nu nmaghathu tsüdi pathikhia nu hi ketan sadha. Hi hangya nu gho no kizaben le.”

¹⁸Ma tsü npi khishala amagha kepa kesü gho nu khi, “Ntsangathu na ntsa tssütsewa jjen wi kemishu kesü satu keben,

¹⁹caghamo kesü ayyi keshü wina gho. Tsüna ajjenwa tsü moshüa nu mathu tsüdila shüdha. Hi ketan hangya nu gho no kizaben le.”

²⁰Tsaseng wi Job na ma leben güccüla shagha nu ma thsü mezüqhe, ma li whia, nu ayyi wi nkhwenca dua.

²¹Ma khi, “Hi kimissü ijja pvü non wina gho, nu hi kimissü wha neng shaden. Apvüwa na khuchi, nu ma khili tsüdi sen bvüdha. Ma nyan kethangwa sa yalo!”

²²Hathu tsüdi hati sa kegho wi lela Job na Anyiza meshensa nu sami nsa.