Read Northern Rengma Naga JOB 10 Bible Online

JOB 10 - Northern Rengma Naga bible

JOB 10

¹Hi hang pi igüccü wadha, hi ileben-nkaghajüh khikebenwa ha kina cülo.

²Hi meshensa nsa lalo, Anyiza. Hi kizalo, pi hi meshensa kebenwa tsüna mangwa nu?

³No daggü nmehai kesau kwe? No sahangkechi tsü nkhichi sale kwe? Nu gheshighenathu kekuli tsü nenten kwe?

⁴No la ithu na muketen ti tsü muten kwe?

⁵No kahang na ithu kahang ti milu kwe?

⁶Isalethu no mangkesa hi kesami tsüdi zansha, nu hi kesazzi keben tsüdi ghang gho ten nu?

⁷No hi nsazzile kesa nyu thola nkwen wina hi hangshaya nbenle kesa chüben.

⁸Nkwen pi itsizhü nu sachi, nu khili akwenwa tsü hi yasa ben.

⁹No anisha pi hi sachile kesa meshenya; palah hi pacha neng pi ayyinikhu sale ben kwe?

¹⁰No kezü pi iba cü nu hi npvüya thsü; no hi ya ijja zzaki wi di shaghaya thsü.

¹¹No agü nu ahatha pi igwo zhü, nu azü nu ahyu pi igü meju chi.

¹²No kahangli nu ghaliki keten pi hi cü, nu no hi kenoncca tsüna hi sapi hangya thsü.

¹³Isala khili hi no matsü tsüthu witsü hi yasa le kiden gho le kesa chüyadha.

¹⁴No hi kesami teshi pi ncüle kesa ghena hi samila nye khe kesa hi cwen gho.

¹⁵Hi kesami sa meyi no ssinu kivvü wa, isala hi kemeshonwa kesa wi lela hi kenondi qo mu meya. Hi mangla nkenye nyi sa nu kejüghe pi hi pongdha.

¹⁶Keujüla hi haicenkeya kesüla saya lethu, no ssensitemi ti hi jügüthia; nu hi patena cüle kesa amankesa lela kuli.

¹⁷No keshüthangla chüza pahan pi hi shun; imiwi nleben ketsu na ji pfüpfü; no keshüthangla hi ssisale acho ketheü kiden den.

¹⁸Anyiza, no mangkesa hi ya pvüghaya thsü nu? anyi kesüla hi npi kemu jüwi hi shü kesau.

¹⁹Azzagi wina meshonqhe ashüjjen wi du kesa tsüna nkahang ti sa kesa.

²⁰Hi kahang cen wa ntendha kwe? Hi teshi yilo! Hi ya matsü kebenwa tsü sen nu inongheya thsülo.

²¹Hi wan wa tendha, nu khiela kheneng gho ntendha— ayyi kejang nu jangketsü kesa kesü wi,

²²kejang ntsa, akekhwen, nu chüshi nkeya yyi kesü wi, kethangwa tsüna kejang sa keten pen witsü.