Read Northern Rengma Naga JOB 11 Bible Online

JOB 11 - Northern Rengma Naga bible

JOB 11

¹Thola majjügi nkemi ha tsüdi lunengchi nten kwe? Ajühjaji kesa tsüna no sapi meshonya thsüten kwe?

³Job, ithu no lunengya nbenle meshen ten kwe? No accükwenkeshü jüh kekhi tsüghena ithu pang cenbhon pia ben le ben kwe?

⁴No khi kebenwa tsüna atsentsa le, nu no Anyiza tuwi methale saden.

⁵Hi Anyiza ya no luneng chi thsü mvu benle!

⁶Ma kemetsa len kejon benle kesa pi no kiza kesale; ciwi anyi na chü kedhu benden. Anyiza na no kepvü-u miwi zengki pi no meten ben.

⁷No Anyiza kedi nu kekhang chüshiya mehai kwe?

⁸Anyiza ghena atssan tsüna kenten nmi, isala tsüna no nkecucha pen wi ben. Anyiza na keshüthu yyi chüben, isala no tsü tsü nchü.

⁹Anyiza kediwa tsüna ayyi miwi la meza, atssükedone miwi meza.

¹⁰Keujüla Anyiza na no ghan sen nu ajühkekaghatenpen wi gho lethu, thowa na ciwi ben nu ma khenya mehai nu?

¹¹Anyiza na anyi thowa na ma men nmi khe chü; ma mathu kekuli nkemehai tsüdi muben.

¹²Gadathu na anyi jühya gho lethu, kejüphonthu na metsa shagha ben.

¹³Nleben meshonya, Job. Anyiza chüyalo.

¹⁴Njjen wi nkemehai nu kesazzithu khulo.

¹⁵Tsaseng wi zükeqhe nu kempvüza sala ayyiwa matang nengya.

¹⁶Tsaseng wi n-gükeccü tsüdila meshen pvü ben nbendha, tsüthu tsüna atssüketi na lle bvü, nu nmeshenla keten tsüti sa ben.

¹⁷No kahang na ghanan-lapvü wi aghani kewegü miwila wegükiaben nu kahang kejang ntsa tsüna aghanen tsantheghi ti wegü yaben.

¹⁸No yazishu ben nu hang yaben; Anyiza na no khweya nu no ya mnanya thsüaben.

¹⁹No nghinyithu messi nbendha; anyi kejonla no wi kekiqa khie ben.

²⁰Isala gheshighenathu tsü haketu sa ghang kevüli, nu bvükeya len nmila ben. Mathu kaghang kesüwa tsüna keshü ghoaben .