Read Northern Rengma Naga JOB 12 Bible Online

JOB 12 - Northern Rengma Naga bible

JOB 12

¹Anle, nthu na anyithu hhaiwa tsüle. Nthu keshü wi kemetsa la nthu gweghe shüaden.

³Isala nthu chüshikeya keben ju hi la ben; hi mang len wila nthu miwi nzzaki; anyi tsüdila nthu khi kechithu tsü chüben.

⁴Ipvüshangthu lela khili hi nankeqhe ben; hi tsatan nu kemeshensa nmi lela, mathu na hi nankeqhe ben; isala Anyiza na kuti tsü wi hi kekhie luneng cüden.

⁵Nthu agükeccü nmi, isala nthu hi nankeqhe den; nthu anyi kesü khuli waketen tsü nankeqhe den.

⁶Isala kaghanfü nu Anyiza nkechüthu na mathu kezü tsü ketan pi mathu cenpvü sa lela cca hang yaden.

⁷Awathu nu aghangsathu lela nthu sansiya kemehai kejon ben;

⁸ayyi nu atssükedone wi sahangkechithu wi mathu kemetsa keü nanlo.

⁹Mathu tsüdila Apvüwa kwen na mathu sachile kesa chüben.

¹⁰Anyiza na ma sahangkechithu len tsütson den; anyi kesüsü kahangli tsüdila ma kwen wi ben.

¹¹Isala nmili pi atsse kemehai pampi keten ti nkhuna pi ajüh kekhi zaya den.

¹²Anyi keqhaithu na kemetsa ben, isala Anyiza tsü kemetsa nu kekhang ben. Anyi keqhaithu na chüshikeya ben, isala Anyiza tsü chüshikeya, nu kuliya kemehai kekhang ben.

¹⁴Anyiza na pheghethu thowa na sapfüya mehai, nu Anyiza na pi atssüzü sa thsüthu thowa na tsü khushiya mehai nu?

¹⁵Khathansha wi Anyiza na atsankegho zan nengya khe kemegi na gho den; ma atssü bhichithu atssü na di gho den.

¹⁶Anyiza na zü nu keshüthangla khang ben den; nyu ma mechukeyawa nu nyu mechu ketenwa manyi qho Anyiza kekhang wi ben.

¹⁷Ma kekhang kesenthu kemetsa sen bvü, nu accülikesathu ya kejüphonthu ti kuli thsüaben.

¹⁸Ma kadimithu pasha nu tsüthu pi atssüzü sa den;

¹⁹Ma keqhaikedi nu kekhangthu satemeni cü den.

²⁰Ma anyi nyu ma nondi ketenthu pi ceen ben thsü, nu anyi keqhaithu kemetsa sen bvü den.

²¹Ma kekhang wi kebenthu pi kimenni thsü, nu kekhang kesenthu kezü pi asakhen sa thsüaden .

²²Ma kethang kesun pi apen jang pi keshü ti kesa wi chi cü den.

²³Ma mizzatentithu sapi zü cü nu keti sa thsü den, isala tsaseng wi tsüthu pasha nu yasa den.

²⁴Ma mathu ccülikesathu pi kejüphon sa, nu mathu na kegoedeja wa dedi thsü den;

²⁵mathu na kejang wi ketsü nu adikinathu ti khulukhulu wa den.