Read Northern Rengma Naga JOB 13 Bible Online

JOB 13 - Northern Rengma Naga bible

JOB 13

¹Nthu khi kebenthu tsüdila hi npi wina zadha. Hi tsüthu tsüdila chüben, hi nthu kechü ju chüben. Hi nmiwi nzzaki le.

³Isala hi Anyiza ssinu kivvükeben khe nthu nye; hi hi kaghatenjüh pi ma ssinu keccücanli mvu ben.

⁴Nthu milimesa pi nthu pala nkechü pabhon den; nthu thola sapi mehaiya nketen dawakechüthu tile.

⁵Mangla nkhi lalo, isathu anyi pahan na nthu kemetsa nyile meshenya mehai!

⁶Hi hi kaghatenjüh khi keben ha kina chilo.

⁷Nthu mangkesa na milimesa ben nu? No kemeshen tsü no milikemesa tsüna Anyiza ghena kekiyi saya benshe ten kwe?

⁸Nthu ma sheipile kiden ben kwe? Nthu ajühkaghatenpen wi ma kaghatenjüh tsü luneng cüle ben kwe?

⁹Anyiza na nthu tsaki nu ghang ghothu, ma nthu wi pala kemehai pahan muya ben kwe? Nthu anyi mechuya keten ti Anyiza la mechuya benle sa ten kwe?

¹⁰Nthu nyu kemeshensa pi kuthiben lela Anyiza na nthu kha ben,

¹¹nu ma kekhangwa tsüna nthu patemessiaben.

¹²Nthu jühbvüthu tsüna ayyinikhu ti nsenla mehai; nthu nyu keluneng jühthu tsüna anisha ti.

¹³Ceen ben wa nu ajühkekhi tsü kesü pi hi cülo, nu tsüthu kekuli yisü ya khati khe sa thsülo.

¹⁴Hi shü lela makesasa lo saben.

¹⁵Hi kaghang tsüdila nmidha, tsalina Anyiza na hi pathi lela tsüna mang saya nu? Hi kaghatenjüh khupi ma tuwi chile ben.

¹⁶Hi kempvüza kesa na hi hangsha cülaya mehai, kepaghenanye gheshighena nyi thola leben-jjan nu Anyiza metuya nten.

¹⁷Hi majjügi khimetha le keben ha kina chilo.

¹⁸Hi hi kaghatenjüh khile kiden ben, kepaghenanye hi kemeshon wi benle kesa chüben.

¹⁹No hi metsi-meni le gho benla, Anyiza? No tsüti sale ben lethu, hi ceen nu shüa le kiden ben.

²⁰Hi ya pala keni keüya thsülo; nu tsü yacülo, isalethu hi ntuwi kuthile kiden nten.

²¹Kemeten pi hi ncüla, nu kemessi pi hi npachala yilo.

²²O Anyiza, no atuwa ajühkhilo, nu hi tsü luneng na. nyelethu hi khi nu no lunenglo.

²³Hi kesamithu tsüna mang mang nu? Hi mangwa sazzi theng nu? Mangwa kesazzi pi hi khüpi-khüja ben nu?

²⁴Mangkesa na hi kuthi ben nu? Mangkesa na hi pi ghinyi kesü ti saten nu?

²⁵No hi pateqhe le kiden ben kwe? Hi aghangwa kesü ti khe mangla nkenye na; no amatsi keqha kesü ssikaghashen ben.

²⁶No ajüh kekha sengho hi shun ben, hi ghanyi tsüwi kekuli ghena lela.

²⁷No assüli pi iccü bhen; no icükha kekhha tsüdila cwen, nu icükhaku khala khüpi-khüja ten.

²⁸Tsüti kesa ghena hi achan kemme ti qanca, akhali na dsakesa thsü kesü ti.