Read Northern Rengma Naga JOB 14 Bible Online

JOB 14 - Northern Rengma Naga bible

JOB 14

¹Anyi nza gwo wi pvügha kegho tsüdila keshü nyi, kahang keminu nu agükeccü.

²Ithu na athighithu ti wan shigü nu pvüjü wa den; ithu na akekhwen ti nmula den.

³Anyiza, no hi ha lela ghang chi, nyelela hi ghan nan nu ijühkaghaten le ben kwe?

⁴Nmetha pi anyi kesü ti kesa miwi mangla kemetha na shhugho nben.

⁵Ithu khathu hangten khe npi wina südhedha, nu ithu asha khaju hangten khe tsüwa la tsüti. No tsü südhedha, nu tsüna kemiliya nben.

⁶Ithu wina khapeghe pvü nu ithu ketan sa thsülo; ithu sa yaben lethu ithu ya agükeccü kahang wi hangya thsülo.

⁷Shüchikea chanton kesü wi kaghang na ben; tsüna hang nu shigü nengya ben.

⁸Ma ghazanthu na qhayi nu ma chonhi na ayyi wi shü lela,

⁹tsüna atssü pi chi cüthu achan kaghani kesü ti shigü shagha ben.

¹⁰Isala ithu tsü shü lethu tsüna asakhen sa den; ithu shü lethu tsaseng wi khiewi ben nu?

¹¹Aghakuthu wi atssü nllela, nu aghajüthu na qha pvü keten tsüti,

¹²anyithu na shü nu kheneng nshagha laden. Mathu na shagha neng nben, isala atssanthu tsü benden; mathu na jen kedu wi shagha nbendha.

¹³No keshü yyiwi hi pi kuthi; nu nleben ketsu npi kagha chu hi ya kuthi thsüa, tsasengwi hi meshen neng keyawa salo kheshilan!

¹⁴Keujüla anyi kesü shü lethu ma kheneng hangya mehai kwe? Isala hi tsü matsü na mehai kayi kesa hie ben, agükeccü tsüwa ha npi kecen chu hie ben den.

¹⁵Tsaseng wi tsü no hi ci, nu hi lesha den, nu no sahangkechi hi ha imiwi no nenya ben.

¹⁶Tsaseng wi no icükha kekhha tsüdi cwen nben, nu no hi kesamithu zhü pi theng nben.

¹⁷No tsüthu teshi nu khupia den; no hi kesazzi sa ketheng tsüdila nyen pia den.

¹⁸Ayikhathu na qanca nu alonshithu na ketsen thsü kesa tsü la gho den.

¹⁹Atssü na alonshithu ghunsha, nu atsankeshathi na ayyi qhopi bvüaden; tsüti no ithu kahang kaghangwa tsü yasa cüden.

²⁰No ithu miwi khangya nu anuphan ghena ithu kesun pi bvü thsü den; keshü wi ithu tsi kemili thsüden.

²¹Ithu tsangathu na kenyuwakü muyaden, isala ithu khiela tsü chü nben nyelela mathu na kejügheya lela ithu pi kiza meyadha.

²²Ithu ketanla ithu gwo kinaa tsü chüben, nu ithu hathakina ketandha.