Read Northern Rengma Naga JOB 15 Bible Online

JOB 15 - Northern Rengma Naga bible

JOB 15

¹Ajüh kaghacang le! Ajüh kaghacang le, Job!

³Kemetsa nyi kesüla no ti khi nben, nyelela ajjügi nkemi jüh tsüti kesa pi ma shü khi nben.

⁴Keujüla no nlen ben le kesa tsü thola Anyiza messi nkesa; thola ma wi khie nkesa le.

⁵No gheshighena tsüna njüh kekhi wina mechanshu chüshi yadha; No kemetsen-kemejjü jüh khi nu kuthi le ben.

⁶Hi no nmeshensa laya mehai; no njüh kekhi tsüdi wi no meshensadha.

⁷No kemeshen tsü no anyi atuwa kepvügha tsüle sa ben kwe? No Anyiza na ayikhathu kezhü tsüwi ben kwe?

⁸No Anyiza na ma cho kekiden tsü za kwe? Anyi kemetsa tsüna nji ketan kwe?

⁹No ithu nkechü mangla chü nben.

¹⁰Ithu na nba tuwi kepvügha nyithu, alikepun nyithu wi kemetsa chükeya.

¹¹Anyiza na n-nonkekwe pi no cüden, isathu no mangkesa na khili tsü meya mvu ben nu? Ithu na ma ghena cca nu ajüh khi.

¹²Isala no tsü lebentsu pi nmieni ithu shun den.

¹³No Anyiza ssinu lebentsu nu ma khisa den.

¹⁴ Ntsakhiwa anyi kesüla methaya mehai kwe? Anyi kesüla Anyiza tuwi meshonya mehai kwe?

¹⁵Mangkesa na Anyiza na ma nyilothu la n-nondi, nu mathu lela ma tuwi nmetha;

¹⁶nu anyi na nkemehai pi atssü ti sa nu jjü; anle, ithu na nankiqanan nu ma men nkemithu le.

¹⁷Tsalina Job, hi mangwa chüben khe kina lo.

¹⁸Kemetsathu na mathu bamyithu wi atsentsa chükeya tsüpi hi sansi cüle, nu mathu na ajühkedhu mangla pi nkuthi.

¹⁹Mathu yyiwi asangthu nmi; ciwi thola mathu ya Anyiza cüzzi bvü kesa nmi.

²⁰Gheshighena nyi, nyu pasha ketenwa na mathu hang keben chu metenmesha den.

²¹Kemessi hhaithu na ma khuna cübhon gho den, nu mathu apvü-nsadha le meshen keben wi kaghanfüthu na gho mathu ssisa ben.

²²Mathu kejang wina bvüale kaghang mangla nmi, kepaghenanye apen pahan wi njünnu kesü na mathu süthiale hieben,

²³nu akamang kemcüwa na ma kamang dsale hie ben. Mathu na mathu tuwi kejang na benle kesa chüben;

²⁴ketizenkesa na kadimi kekhang kesü ti mathu ssikesali le hie ben.

²⁵Tsüti kesa tsüna mathu kwen shen pi Anyiza ccüca nu Kekhang ntsawa nkhichi kesa metu ketenwa tsüle.

²⁶Tsüwa tsüna kapvü nu matang keten nyi; ma leben-dhu ntsa nu ma tsonhi khukiya, nu Anyiza ssikesali le ben.

²⁸Tsüwa tsüna anyi anyunutithu shu, nu ajjen pvüthu na bvükea jjen ghong keya tsü, isala aghi na anyunuti nu ajjen tsüthu yasa den.

²⁹Mathu matsü kesie keban sa nben; mathu ji sa kebenthu kesüla kesie ben nben. Mathu ghayen lela nmila ben,

³⁰nu mathu kejang wina bvüya nben. Mathu achanton kesü anni na ma cüna mecang, nu ameghü na ma kepvüthu mopi bvükea ti sa ben.

³¹Keujüla mathu jüphon ntsa nu nkemehai nondithu nkemehai tsüna mathu kutimen sa ben.

³²Matsüwa na npi kecen wi mathu jü wa, achan cüna kesü ti shü nu mejjü neng meyala ben,

³³mathu kemeshentsse ton kesü na ma bi kemejjü keben wi keshu keten ti sa ben; oliv ton kesü ma kepvü na qanca keten tsüti.

³⁴Anyiza nkenondithu na ashicü benya nben, nu anni na alaa pi sa ketheng jjen tsü yasa ben.

³⁵Anyi hathu na kivvü cho sa nu nkemehai kuliden; keshüthangla mathu leben wi kemechu na pongben.