Read Northern Rengma Naga JOB 17 Bible Online

JOB 17 - Northern Rengma Naga bible

JOB 17

¹Hi kahang sakhen tetsakidha. Hi ihatha nshhu chaladha. Ighena ashüjjen ketan khe mangla nmidha.

²Hi anyi tsüdila khati hi nankeqhe khe ghang .

³Hi ajüh tsentsa saben, Anyiza, ijüh yacülo. thola hi ajühkhi keben tsü kiqale kesa nmi.

⁴No mathu leben ya chüshi meya thsüle khendha; khilitsü mathu ya imiwi khangya nsa thsü lalo.

⁵Kheni ajühbvü kesü wi anyi kesü na apisa ghena ma pvüshangthu matsa, nu ma tsangathu na tsü ghena ketizen sa.

⁶Nu khili anyithu na ajühbvü hapi hi shunben; mathu na gho immi meshuki.

⁷Ilebengükeccü ghena inyon na pala nmula zzi; iccü nu ikwen na cüh pi akekhwen ti sa.

⁸Atsentsa saten le khi ketenthu na amansadha, nu mathu tsüdila hi pi acenpvü nkemi nyi ti nkhichi saben.

⁹Kenyuwakü yaqo le khi ketenthu na mathu na meshon le kesa meshen pfüpfü wadha.

¹⁰Isala keujüla mathu tsüdila gho ituwi ngan lela, hi mathu kesüla metsa le kesa muya nkesa.

¹¹Itsathang na wadha, nu hi sa le kesathu sa meyala; hi kaghang nmidha.

¹²Isala ipvüshangthu na aghaja tsüna ghanan kewegü le khi; mathu na kethang tetsakidha le khiben, isala hi tsü hi kejang wi ben le kesa chüben.

¹³Hi kaghangwa tsüna keshü yyi tsü ketandha, ciwi hi kejang wi jen waden.

¹⁴Hi ashüjjen pi iba le chi nu acanie hi dsa ketenthu tsüpi ijja nu itssüggüthu le ci den.

¹⁵Khiela hi kaghang kesüla ben kwe? thowa na kesüla mu nu?

¹⁶Khathansha hi keshü yyiwi du khe kaghangwa tsüna hi gweghe wa nben.