Read Northern Rengma Naga JOB 19 Bible Online

JOB 19 - Northern Rengma Naga bible

JOB 19

¹Nthu mangkesa na ajühkhi pi hi meten ben nu?

³Matsü kaghapen wi nthu na hi kimenni, nu nthu hi kethen ghena kejüghe mangla nmi.

⁴Keujüla hi sazzi lela tsüna khati nthu patena nu?

⁵Nthu imiwi mehaiki le meshen den, nu hi ketizenkesa tsüna hi kesami ghena le meshen.

⁶Anyiza na ha sakechi nthu mu meya kwe? Ma hi ghanya le kesa ghena aca pi die.

⁷Hi ma gheshighena tsü ssinu kematangli, isala anyi kesüla tsü kina nben; thola hi kemeshon ghena khie keben tsü nza.

⁸Anyiza na alen khendha, nu hi shhuya ntendha; ma ilen pi kejang wi kuthidha.

⁹Ma hi keben-keyeng tsüdila sen bvüa, nu inyan kemehai yasadha.

¹⁰Ma hi kihhe keculidha. Ma hi kaghangwa tsü pfüdha, nu hi teshi pi jü nu shü thsüale sadha.

¹¹Anyiza na ma lebentsu nu aghepvü pi hi shunben; ma hi pi ma ghinyi nkemehai ntsa ti sadha.

¹²Ma hi ssisalo kesa ma süpahizi kesunchi; mathu na kekuthiku chhü nu inithsüjjen vüya.

¹³Anyiza na icünyuthu ya hi teshi thsüdha; hi kechüthu tuwi hi kijünyi kesü sadha;

¹⁴ishilithu nu ipvüshangthu na bvüdha.

¹⁵Ijjen wi ikejjen sa keghothu na hi malidha; imaghalethu na hi pi kijünyi, nu asang kesü ti sa wadha.

¹⁶Hi imagha kesü ci lela ma hi n-nusha ladha— ma hi kiqa cülo khie lela.

¹⁷Iwubvü na ihathakeshhu nkahancha ladha, nu icünyu ntsathu na hi ntsaki mvu ladha.

¹⁸Ghanyithu na hi mu keya wi hi nkhichi nu hi nankeqhe den.

¹⁹Ipvüshang ntsathu na hi nanqanan wadha; hi ghali ntsa ketenthu na kheneng hi shun wadha.

²⁰Ihyu na igü wi hagi pi keqo-kina wadha; hi shü zizi hang ben.

²¹Nthu na ipvüshangthu! Hi nantizen cülo! Anyiza kwen na hi kihhe sheipidha.

²²Nthu mangkesa na Anyiza na sa keten ti hi meten-mesha le ten nu? Nthu na agükeccü pi hi kecü qo cü nsa kwe?

²³Hi khatila anyi pahan ya ijühthu meshen, nu lesüshen kesü wi tsüthu pi zhütheng thsü mvu ben nu!

²⁴nyelela ijühthu tsüpi alon miwi hoki, nu tsü zhü nu tsüthu ya anuphanla benlo kheshilan!

²⁵Isala hi tangwi anyi pahan na asakhen wi gho nu isheipiya benle kesa hi chüben.

²⁶Kesakinaa ghei na ihyu dsakhi lela, agwo hawa ha na ben nu hi Anyiza mu den.

²⁷Hi hi ketanla inyon pi ma mu den, nu ma ighena kijünyi kesü sa nbendha. Nthu hati kekhi ghena hi kempvüza sa meyala,

²⁸“Ithu na khatinu ma patenaya nu?” Nthu na hi ssisale kesa ghena nthu jüh pen bha.

²⁹Isala khilitsü njünnu messi yalo— Anyiza leben kekha sengho kesami nyi miwi chi keten njünnuwa tsü, isanu nthu ya ciwi nyu jühkaghaten keten nyi kesü benle kesa chüya thsüle kesalina.