Read Northern Rengma Naga JOB 2 Bible Online

JOB 2 - Northern Rengma Naga bible

JOB 2

¹Tangnyithu na Apvüwa tuwi kegho neng tsathang wi Satan na mathu jawi ben.

²Apvüwa na ma wi keü, “No khiewa wa nu?” Satan na khineng, “Hi kahe wi alentsen nu kegoe kevüli ghole.”

³Apvüwa na ma keü, “No imaghawa Job chüben ma? Ayyi wi anyi kesüla ma ti leben tsentsa sa nu kemehai nmi. Ma hi kinyi nu nkemehai nsale kiden-kesha ntsa saden. No ya ajjügi mangla nkemi wi ma ssikaghashen thsülo hi wi keü, isala Job na khili lela leben tsentsa saben.”

⁴Satan ma luneng, “Anyi kesü na hangben le kesa ghena pala tsüdi teshiaben .

⁵Isala keujüla khili no ma gwo patena cü lethu, ma no kishen cüaben!”

⁶Tsalina Apvüwa na Satan wi khi, “Isalethu ma pi no kemeshen sa nan, isala no ma pathiya nben.”

⁷Tsaseng wi Satan na Apvüwa ketenpenwa tsü teshi nu wa khumakhujü sapi Job gwo maben wi shhugho thsüa.

⁸Job na wa bhanieku wi donki nu apfü kegi kesü pi ma kekhuma tsü while khuya.

⁹Ma wubvü na ma wi khi, “No khili kecu hatu wi ti leben tsentsa saben man kwale? Mangkesa na Anyiza kishencü nu shü wa nsa nu?”

¹⁰Job na khineng, “No ajjügi nkemi khiben man! Anyiza na pala kemehai pahan kesunchi lethu ishinyi na tsü yaden, isala ma agükeccü kesunchi lethu ishinyi khati alebenmagha sa nu?” Job na tsüdi wi ketizensa lela mangla khipi Anyiza nmatang.

¹¹Job pvüshangthu kecheng tsüna Teman nyunuti nyiwa Elifaz, Shua yyi wina kegho Bildad, Naamah yyi wina kegho Zofar. Mathu na ma ketizensa ntsa keben za keya wi wa Job leben satecca le südheya.

¹²Mathu na alen kesie wina Job mu, isala ma chüshi meyala. Mathu na ma chüshi keya wi qai nu leben güccü, nu mathu thsümeni mezüqhe nu mathu leben ketizenkesa wi ayyiwen whapi tangwi cügi nu pi mathu li wi chi.

¹³Nu mathu ciwi ma ssinu ajüh kesüla nkhila ghanan tagü nu ghaja tagü donki, kepaghenanye mathu na ma ketizensa mtsü keben kemu ghena.