Read Northern Rengma Naga JOB 21 Bible Online

JOB 21 - Northern Rengma Naga bible

JOB 21

¹Hi khi keben ha kinalo; tsüthu tsüdila hi nthu wi leben sa tecca keya kekhi.

³Hi ajühkhi keya tsü kesü pi cü, nu hi khicen lethu nthu na hi nankeqhe ya mehai.

⁴Hi ssikitagha keten tsüna shü ketenwa nye; hi mehiecha kesa tsüna ajjügi kemehai ben.

⁵Hi ghangchilo. Tsüna nthu pateqhe pi ajüh nkhila ghang ben thsü qo kwe?

⁶Hi khathansha imiwi mangwa sa khe meshen chithu hi mangla nchüla kedheggü pi messi wa den.

⁷Mangkesa Anyiza na nkemehaithu ya hang thsü, mathu ya qhaiya thsü nu mehai kayi thsü ten nu?

⁸Mathu na atsangathu nu atsanga ngathu ben, hangben nu mathu hang keshagha ghang den.

⁹Anyiza ketizenkesa pi mathu jjenku chi nten; mathu na khiela messi nu hang thsü nten.

¹⁰Anle, mathu mesüsithu na azzatsüya, nu kedan-kagha nsala caya den.

¹¹Mathu tsangathu na khaghaneni zzathu ti bvü nu kiponli ben den,

¹²nu harp nu lalali kekhouthu nie nu nashü den.

¹³Mathu na lebencca nu hang ccaya nu ketizen nsala ceen nu shü den.

¹⁴Gheshighenathu na mathu teshi pi mathu ketan sa thsülo Anyiza kiza den; mathu kahang wi ma kemeshen chüya mvu nten.

¹⁵Mathu na Anyiza kekuli nsala mehai nyelela ma wi kekiqa kekhie nsenla mehai le meshen den.

¹⁶Mathu na mathu kezü ghena haicenya le khiden, isala hi mathu kemeshenwa tsü yaya nben.

¹⁷Gheshighenawa kewegü tsü patenendha kwe? Mathu kesüla ketizen kesa metudha kwe? Anyiza ma leben ketsu wi gheshighenawa meten,

¹⁸mathu pi ameghü wi amatsi mopi bvü kesa ti, nyelela caghamo wi ayyinikhu mo sen bvü kesa ti sa kwe?

¹⁹Nthu na Anyiza na aba kesami ghena atsanga meten cüten le khiben. Nye! Anyiza ya kesamithu ketanla mathu metenya thsülo, ma ya mathu kesami ghena ma tsü sale kesa pi ccücalo.

²⁰Kesamithu ya mathu kemeten pvüya; mathu ya Kekhang ntsawa Anyiza leben kekha tsü chüya thsülo.

²¹Khathansha wi ithu kahang na wa khe, ithu tsangathu na anonghe benla nye khe meshen ben ten kwe?

²²Anyi kesüla Anyiza kemisi pen wi kebenthu jühkaghaten ketenwa tsü sansiya mehai kwe?

²³Anyi pahan na ma keshü tsathang kecu wi ma gwo süqon ben den; mathu na anonghe nu yazishu mathu gwo ghanja kemehai saben nu shü den.

²⁵Kepathu tsü anonkeghe nmitha; mathu na aleben daggüla hangben nu shü wa den.

²⁶Isala tsüdila makesü shü nu pi vhüden, amedhenthu na mathu tsüdila pong ben den.

²⁷Nthu na khatila nankemeghü tsü meshen pi pong pvü ten khe hi chüben.

²⁸Nthu na hati keüden, “Anyi kedi, nkemehai sa keghowa jjen tsüna khili khie wa ben nu?”

²⁹Nthu kijünyi thu ssinu keccünengli n-nan kwe? Mathu ajüh sen kegho tsü nthu na nchü kwe?

³⁰Anyiza na ma lebentsu nu kemeten tsathang wi keshüthangla gheshighenawa tsü heisha den.

³¹Ciwi anyi kesüla gheshighena nyiwa metsi-meni nyelela ma kuli ketheng pi ma cüle kesa nyi nmi.

³²Khathansha wi ma pie nu kevhüpen wi, aghihie kemehai sa keben shüjjen witsü wa khe,

³³hazar hazar na ma pie nu wa ketenthu gwegheya, nu ayyi lela mehaitsü ma miwi du den.

³⁴Isathu nthu tsü, majjügi nkemi pi ileben satecca le ben man ha! Nthu na hi luneng kechi tsüdila milikemesa ketan!