Read Northern Rengma Naga JOB 23 Bible Online

JOB 23 - Northern Rengma Naga bible

JOB 23

¹Hi khili kecu hhaghe nu lebenmaghala Anyiza matangben; hi kaghadhi zan nengya nden.

³Hi khiewa ma muya ben khe chüya nu khati nu ma ketenpen wi wayaben khe chüyalo kheshilan!

⁴Hi kaghatenjüh pi ma tuwi khi nu isheikepi keccücanlijüh tsüdi pi chiya mvule.

⁵Ma khati le khi kesa nu khati ijüh luneng kesa khe hi chüya mvu ben.

⁶Anyiza na ma kezü tsüdi pi hi matang kesa kwe? Nye, hi ajühkhithu ma kina kesa le.

⁷Hi atsentsa saben; hi Anyiza ssinu khiya mehai; ma kutitan na hi anuphanla nsazzi le khia kesa.

⁸Hi nishu wiwa bha wa, isala Anyiza na ciwi nmi; nu hi nitu wiwa bha wa lela ma nmu.

⁹Anyiza na acüla nu agha wiwa kuli gho, isala hi khilila ma npi mu.

¹⁰Isala Anyiza na ilen kekhha tsüdi chü; ma hi ghan-nan lela hi metha ben kesa muya ben.

¹¹Hi leben tsentsa sa nu ma kessikeya lenwa tsü nie nu khiela kahe wi deja wa nten.

¹²Hi keshüthangla Anyiza jühkhukechi tsüna mangwa khe tsü nie den; Hi hi kenmvuwa nyela ma kenenwa nie den.

¹³Ma khiela kemili nten; thola ma matangya nben, nyelela ma sa mvu kebenwa tsü khenya nben.

¹⁴Ma ighena mangwa kiden theng khe tsü sacen shaben; tsüna ma kiden ketheng kejon jawi kesü;

¹⁵Hi ma tuwi messi nu kedheggü den.

¹⁶Kekhang ntsawa Anyiza na hi kempvüza yasadha. Kejangwa tsüna hi sapi nmu thsüla lela hi sapi messi thsü kesawa tsüna Anyiza na khe kejangwa na nyele.