Read Northern Rengma Naga JOB 24 Bible Online

JOB 24 - Northern Rengma Naga bible

JOB 24

¹Mangkesa Anyiza na ghankenan tsü kesü ssan pi ntheng nu? Ma kekuli kesathu ghena ajühtsentsa tsathang.

²Anyithu na ayyi kejon muya le kesa ghena aggü lon tsü khupheghe den; mathu na khaghaneni ghanfüya nu pi mathu ji jawi saghu yaden.

³Mathu na magha-maghangthu gadathu ghanfüya, nu denyilewa na amenkepvü npi kedhi chu ma mesü süpon pi theng yaden.

⁴Mathu na ketha-uthu kemeshon mukeya len khen, nu nkemithu meten pi bvü wa kuthi ben thsüden.

⁵Tsalina ketha-uthu na aghang gada ti aghang nkemi yyikeshü wi atsse bha; mathu khiela atsanga ghena atsse mukeya nmi.

⁶Mathu na mathu ji nkenye alli tsü wwi, nu gheshighena ji kemeshentsse bithu saghu den.

⁷Aghaja wi mangla pi mathu wheng nu jen keya nmi, kese wi mangla pi mathu khwe keya nmi.

⁸Ayikhathu miwi atsankegho tsüna mathu ten, nu mathu na alonshi wi kaghatsughula n-nie ben.

⁹Anyi nkemehaithu na aba nkemi tsangathu pi nssümaghathu sa den nu ketha-uwa tsangathu pi mathu men kedhi sala ssiya den.

¹⁰Isala ketha-u tsü mathu thsümeni nmi lela wa nsathu yishü; mathu ghamathi awhengsu wwi nwathu yishü.

¹¹Mathu na oliv pi nyeggü pi adeli sa, nu kemeshentsse bithu pi kisengtssü saden, isala mathu tsü dighethi benden.

¹²Mesa-mena pvü nu shü wa ketenthu na anyunutiwa non wi magha ben, isala Anyiza na mathu kekhie nkina la.

¹³Ciwi kewegüwa tsü nkeya mvu nyithu na ben; mathu na tsü chüshi meya nyelela tsüna khiewa waben khe chü nten.

¹⁴Tsantheghi keshagha wi anyi kepathi nyi na shagha nu wa ketha-uthu pathi den, nu aghaja wi mathu na ghanfü den.

¹⁵Keqhezawa na janjügü tsü kegho hie ben den; thola ma nmu thsüle kesa ghena ma ma mmi whengbhon yaden.

¹⁶Aghaja wi kaghanfüthu na ajjenthu paqhe du ghoden, isala aghanan witsü mathu na kuthi nu kethangwa tsü ghü ben den.

¹⁷Mathu na tsakethang tsü messiden, isala kejang witsü mathu ghena kemessi nmi.

¹⁸[11]Atssüketi na gheshighenathu mejjen pi bvüden, nu ma ji alli tsüna Anyiza kishen-keshi pvü, nu ma kemeshentsse lli witsü kulile nwala den.

¹⁹Aghola na keyeng nu kemegi wi tssüzighe den, tsüti kesamithu la kahang yyiwa wina nmila den.

²⁰Khilitsü mathu jja lela mathu meshen nbendha; Aghei na mathu dsa nu chanton kiccü ti yasa den.

²¹Tsüti sa ben, kepaghenanye mathu denyilethu nkhichila, nu ccatssü pi ashicü nkemi nzawa ncüla kesalina.

²²Anyiza na ma kezü wina kekhangthu yasa den; Anyiza na kulichithu gheshighenawa na shü den.

²³Anyiza na ma ya yazishu hang thsülaya mehai, isala matsü tsüdi wila ma ghangki ben den.

²⁴Matsü keujü wi gheshighena na haikayi ben den, isala tsasengwi ma kepagha kesü ti jü wa, nu asu wwiya kesa magi kesü ti sa den.

²⁵Anyi kesüla tsüna tsüti nyele khiya mehai kwe? Anyi kesüla ijühthu tsüna atsentsa nyele kesa jjügi khiya mehai kwe?