Read Northern Rengma Naga JOB 28 Bible Online

JOB 28 - Northern Rengma Naga bible

JOB 28

¹[14] Ayyi non wi rükatssü chhüya keten pen na ben. Ciwi suna satemetha keten pen na ben.

²Anyithu na ayyi wina amighe chhüshi yaden. nu alonthu wina lezza leya den.

³Anyithu na kejang ntsa wi wa. Mathu na ayyi kedhuthu wi tsü bha den; Nu kejang witsü alonshithu chhü den.

⁴Kesie wi thola nkahang pen wi nyelela anyi ccü pi npi kenni pen wi anyithu na amihi machuchu tsü chhü den. Ciwi mathu na ayyiku wi ali tsü yi sen caghangca kuli.

⁵Atsse na ayyi wina shigü shagha den. Isala ayyi non wi tsüdi pakhhi-paghe nu pachaden.

⁶Ayyi lonthu wi safir na ben, nu ma nikhhuthu wi suna benden.

⁷Amumu kesüla ma men kedhu kechhü len tsü nmu, nu akamang-kemcüwa kesüla ciwi npi pighe wa.

⁸Ssensitemi nyelela aghangsa ghekina kesüla kecaghang len tsüthu wi npi wa.

⁹Anyithu na alonshi kekhang ntsathu tsü chhü, ayikhathu tsü ma ccü wina chhü pi den.

¹⁰Mathu na alonshi hobhi keshhu wi, mathu na alon men kedhu muya den.

¹¹Mathu na chhü sen nu aghaku tssü kebvü shhugho pen wi wa, ma non wi kebenthu tsü chhüshi chiden.

¹²Isala kemetsa tsü khiewa muya mehai nu? Ithu na khiewa chüshikeya chüya mehai nu?

¹³Kemetsa tsüna anyi jawi muya nben; thola ma men ntsawa tsü nchü.

¹⁴Atssükedonpen nu atssüdonthu na kemetsa tsüna ciwi muya ntenle khi.

¹⁵Tsüna rükatssü nyelela suna pi shüya nten.

¹⁶Suna nu alon menkedhu kemehai ntsathu lela tsü men ncen.

¹⁷Tsüna suna miwi la ma men benki, suna khu nyelela ahyi kesü miwi la ma men benki.

¹⁸Kemetsa menwa tsüna koral, kristal, nyelela rubi lonthu miwi la dhuki.

¹⁹Topaz kemehai ntsa nu suna kemetha ntsa pi kemetsa men ghapeya nben.

²⁰Isathu, kemetsa keshhugho pen tsüna khie nu? Ithu na chüshiya le kesalina khie chüya mehai nu?

²¹Kahangli keben kesüla, awa kesü pighe ketenwa tsü lela tsü muya nben.

²²Keshü nu keyasa lela manyi jühjüwa ketan zaya le khi den.

²³Anyiza ketan alenwa tsü chüben, kemetsa tsüna khiewa muya ten khe ma chüben,

²⁴kepaghenanye ma ayyi kenten wila muben, atssan kekhu wi pala tsüdila muben.

²⁵Anyiza na kekhang pi ameghü kecü, nu atssükedone ketikesie südhekeya wi;

²⁶Anyiza na khiewa atsangho wa thsü khe südhe; nu atsanphagha-kulukeshü lenwa tsü cenya khe;

²⁷ciwi ccüna kemetsa mu nu ma men keben chüya— Ma tsüna yaqo le kesa khuchi.

²⁸ Anyiza na anyi wi khi, “Metsaya le kesalina nthu na Apvüwa kinyikülo. Chüshiya le kesalina nthu na nkemehaiwa wina shhughoya.”