Read Northern Rengma Naga JOB 29 Bible Online

JOB 29 - Northern Rengma Naga bible

JOB 29

¹Job na ajühkhi neng shagha.

²Hi kahang ha kutitanla kheneng wala Anyiza na hi hie keten tsüwi ti sayathu mehai ten ne!

³Anyiza na keshüthangla hi ssi, nu hi kejang wi wa lela kethang pi hi cü.

⁴Atsathang tsüthu tsüna hi mehai kayi keten wi, nu Anyiza ssinu apvüshang kesa na ijjen khwe.

⁵Tsü tsüwi Kekhang ntsawa Anyiza na hi ssiden, nu itsangathu tsüdila hi vüben keten.

⁶Imesü nu inenithu na tsenitssü kejon khuchi, nu hi oliv tonthu na ayyi-lonshi ntsa wi lela shigü.

⁷Khathansha wi anyunutiwa wi keshenpfüthu na kemetuli nu hi mathu jawi donkiya khe,

⁸kepvünyithu na hi muya meyi hi tankhu, nu keqhaithu na hi kenyuwakü ghena shagha.

⁹Anyi ccülikesathu na nkeccünengli la;

¹⁰anyi kemechan ntsathu lela ceen ben wa.

¹¹Anyithu na hi kemu nu ijüh kekhi kiza tsüdila hi kulikechi kemehai cüki khi.

¹²Haketu na pala khie shaghathu hi mathu kiqacü; hi magha-maghangthu na khiela wakeya nkemithu wi kekiqa pi cü.

¹³Anyi mangla nkenyethu lela hi seng, nu denyilethu kiqa pi yazishu saya thsü.

¹⁴Hi keshüthangla kemeshon nu ketsatan kuli.

¹⁵Hi anyon nkemuthu nyon sa, nu accü nkemehaithu ccü sa.

¹⁶Hi kahhatuthu ba kesü ti, nu kijünyi thu gükeccü wi mathu sheipi.

¹⁷Hi kedeggüthu kekhang yasa, nu mathu nkechathu tsü kekasha cü.

¹⁸Hi keshüthang wila kesie hang nu anonkwen, nu ajjen wi cca shü benle ghang den.

¹⁹Hi achanton kesü ma ghazan na keshüthangla atssü ten, nu ma cünathu na akejan pi tenki keben ti sa.

²⁰Anyi tsüdila keshüthangla hi seng, nu kezü na khiela imiwi nmila nsa.

²¹Hi kesansi khuchithu anyithu na ceen ben, nu hi mangwa khi khe mehaitsü kina; hi kekhisha sengwi mathu na mangla nkhi nengla.

²²Ijühthu na atsankegho bi ti mathu miwi du;

²³anyi tsüdila tsüthu na mehaile khi, allikecathu na leghe wi atsankegho yaya keten ti.

²⁴Mathu na kempvüza zeng wathu hi immi kemeza pi mathu mu thsü; inonkeghe mmi na mathu satezü cü.

²⁵Hi aliwa saya nu ajüh südhe; kadimi kesü ma süpahithu ssiketen ti mathu ssi, nu mathu ccükwenkeshü wi leben sa tecca cü.