Read Northern Rengma Naga JOB 3 Bible Online

JOB 3 - Northern Rengma Naga bible

JOB 3

¹ Asakhen ntsawa Job na ceen ben meyala ma kepvügha tsathang tsü kishencü.

²O Anyiza, hi kepvügha tsathang tsü kishencülo; kishencü pi hi npvükeya ghaja miwi chilo!

⁴Tsü tsathang tsüpi atsankejang salo, Anyiza. Tsü tsathang tsü nmeshen neng lalo; kethang ya tsü miwi nwegü neng thsü lalo.

⁵Tsüpi atukejang nu kejang kedhu salo; akulukeshü pi shanbhon, nu aghani khupilo.

⁶Amapi kesi wi aghaja tsüwa pi nsi ghula, nu khiela tsüpi nsi neng thsü lalo;

⁷tsüpi mangla nkenye, anonkeghe nkemi ghaja sa thsülo.

⁸Demathu, Leviathan [6] khenya ketenthu na atsathang tsüwa tsü kishencülo kizalo.

⁹Ghotsi sükhawa ya nwegü thsüla, tsü ghaja ya atsakethang muben le n-ghang thsü lalo.

¹⁰Hi kepvügha thsü ghaja tsü kishencülo, hi pi agükeccü ahathakina wi shhugho thsüle kesalina.

¹¹Hi ya ijja pvü non wi shü nyelela hi pvüghaya meyi shü thsüthu mehai kesanan.

¹²Mangkesa ijja na ma phedi miwi hi pie nu? Mangkesa na ma hi ne nu ghanja nu?

¹³Hi tsü tsüwi shü lethu khili ha cca ben kesanan,

¹⁴kadimi nu kekhang kesenthu na kheni kadijjenthu kesapfü tsüti jenben kesa.

¹⁵Isalethu hi kaditsathu, suna nu rükatssü pi mathu jjen kepong sa kethengthu ti jenben kesa,

¹⁶nyelela keshü pvüghakeya ghanyi kesü ti jen kesa.

¹⁷Nkemehaithu na ashüjjen wi mathu nkemehai teshi den, nu nchala kekulithu na asakhen wi ccaya den.

¹⁸Atssüzüthu lela magha nu ahza khukechithu nmila anonghe nu ccayaden.

¹⁹Anyi kemechan nu ajümuthu, nu nssümaghathu, tsüdila asakhen wi ma kemeshen sa keya na ben.

²⁰Mangkesa anyithu ya agüccü hang thsü ten nu? Mangkesa kewegü pi ahathakinathu cüten nu?

²¹ Mathu na keshü hieden isala tsüna gho nten; mathu na keben-keyeng miwi ashüjjenwa nmvuden.

²²Mathu na shü nu pi npi kevhü chu anonghe nten;

²³Anyiza na mathu ghena atucüki pi kuthitheng nu alen tsüdi wi mathu vü ben.

²⁴Hi dsa kesa mithon wi anongü nu hi khiela nkaghadhi sa meya.

²⁵Hi messi pi qhethiketen keben tsüdi sacen den.

²⁶Hi lebenkecca nu keyazi nmi, nu igükeccüthu na khiela asakhen nmi.