Read Northern Rengma Naga JOB 30 Bible Online

JOB 30 - Northern Rengma Naga bible

JOB 30

¹Isala khilitsü imiwi kaghanyithu na hi pi keponsa sa ben! Mathu bathu na keshüthangla ma men nkemi sa, hi mathu ya iffüthu kiqa pi khaghanenithu hie thsü nben.

²Mathu na anyi nkekhang akhang kesü, kezü nmitha nu ighena kekuli mangla sa meya.

³Mathu na hhatu mtsü pi ghamala aghaja agheja wi nyu nkemi pen wi achan ghazan keqha lela meqan.

⁴Mathu na ayyikeshü wi aghangthu pfü pi dsa, ma kenyan nkemi aghatangthu ghazan lela!

⁵Anyi tsüdila kaghanfüthu wi magha keben ti maghala mathu jügü.

⁶Mathu na ayyikuthu wi nu alonshi-qhe kete maku kechhü wi hang.

⁷Mathu na agheja wi aghangsathu ti kohon, nu aghangbhon cakhu wi acücü sa ben den.

⁸Anyan nkemi nu mang men la nkemi khang kesü! Ayyiwa wina mathu jügüshidha.

⁹Khili mathu na gho hi nankeqhe ben; hi mangla nye nu mathu pangbi kesü sadha.

¹⁰Mathu na hi nan-nontssü wadha; mathu kemeshen tsü mathu na ighena mehai mtsü le nu ghola immi lela meshuki.

¹¹Anyiza na hi sapi nzü nu kekiqa nkemi sakea ghena mathu leben ketsu tsüdi pi hi matang.

¹²Anyi khang hawa ha hi ghanten nu hi ssikaghashen; mathu na hi kesun pi bvü thsü, mathu na asakhenwa hi pathiale kiden.

¹³Mathu na hi kebvü len khen nu hi yasale sa; isala thola mathu khenle kesa nmi.

¹⁴Mathu na ighapeng kukebi wina keshubhon dugho nu imiwi pacha dugho.

¹⁵Kemessi na imiwi bendha; hi kedi kemehaiwa tsüna ameghü na mo pi bvüa, nu hi mehai kayikeya tsüna akulukeshü ti sadha.

¹⁶Khilitsü hi shüale bendha; i-gükeccü na ccakeya nmidha.

¹⁷Aghaja wi igü tsüdila kiqan; kinaa tsüna hi kekhang pi khiela cca meya.

¹⁸Anyiza na isun keqhan wina hi zanya, nu igwomejuwa taghan pi matsi nkenye sa.

¹⁹Ma hi khala pi anisha wi cü chia, hi kenenkagha miwi mehaiki nsala.

²⁰O Anyiza, hi no cichi, isala no khiela nluneng; nu no wi kekhie kesa wi no nkina chila.

²¹No imiwi daggü ntsa sa; no no kekhang tsüdi sen nu hi meten-mesha.

²²No ameghü ya hi mo pi bvü thsüa; no caghamo nkemehai wi hi piekevüli cü.

²³No hi ssi wa shü thsüa tendha le kesa hi chüben, anyi tsüdila metuketen ghena kiden pi ketheng witsü.

²⁴No mangkesa ma kahang yasakea ha pon ben, nanketizen kekhie khe mangla saya nketen nyi ha?

²⁵Hi anyi agüccü kebenthu ssinu qai, nu nkemithu ghena ihathana nsa kwe?

²⁶Hi anonkeghe nu kethang nmvu ten nan, isala tsü mithon wi agükeccü nu kejang ghodha.

²⁷Hi ilebengükeccü nu kinaa ghena hi zanthidha; atsathang wila agükeccü ji pfüpfü ghoben.

²⁸Hi aghani kewegü nkemi wi kegoe; hi anyithu tuwi ngan shagha nu kekiqa khie.

²⁹Ihhai na ahathana nu caghangca kesa hhai ti whewhe nyelela awaketiwa kekhou hhai ti sa.

³⁰Ihyu na nimugho; muwhe pi hi mecang ben.

³¹Kuti wi hi anonkeghe hhai zaya keten, khilitsü hi ahathakina, nu kiqai hhai ketan zaya wadha.