Read Northern Rengma Naga JOB 31 Bible Online

JOB 31 - Northern Rengma Naga bible

JOB 31

¹Hi kekishen kedhu kesü sadha, ghala kesü tepagha nu n-ghang le kesalina.

²Kekhang ntsawa Anyiza na ithu wi mangwa kuliten nu? Ma khati anyi kekuli kutimen saten nu?

³Ma wan ketizenkesa nu keyasa kesun pi sazzi ketenthu miwi chi den.

⁴Anyiza na hi kekuli tsüdila chüben; ma ilen kekhha tsüdila muben.

⁵Hi khiela gheshighena kekuli nsa, nu khiela nyu kemechu nkiden le kesa kishen ben.

⁶Anyiza ya hi pi kewhuchan kemeshon ntsa wi whu nanlo, isathu ma hi nsazzi le kesa muya ben.

⁷Keujüla hi alen kemeshonwa wina kheneng nyelela nkemehai wi hi nen bvüa, keujüla ikwen na kesami sapi nmethala,

⁸isalethu hi yangdsaketenthu ya yasa thsülo nyelela kepathu ya hi kedsauthu yang ketheng tsü dsa thsülo.

⁹Keujüla hi ijenphon wubvü nenya, nu ma jenka na ameiwa kuthi nu ma cwen,

¹⁰isalethu iwubvü ya npvüza kepa tsse sa, nu npvüza kepa we wi jen thsülo.

¹¹Gheshighena tsüti kesa tsü ya keshü pi meten cülo.

¹²Tsüti sale kesathu tsüna keyasa, anni ti hi keben tsüdila mecang kesa.

¹³Khathansha wi imaghathu na leben-nkaghajüh khipi hi shun khe hi tsü kina nu meshonqhe sapi mathu cüden.

¹⁴Hi tsüti nsa lethu hi khati Anyiza metu kesa nu? Anyiza na ijühkaghaten kegho wi hi khatile khiya kesa nu?

¹⁵Hi sahangkechiwa Anyiza tsüna imaghathu la sahang chi.

¹⁶Hi khiela hhaketuthu nkiqala nsa; hi khiela denyilethu ya atu-nkemi sa nu nhang thsü.

¹⁷nyelela hi dsa nu magha-maghangthu ya ghama nben thsü.

¹⁸Hi kahang chu mathu noncca gho.

¹⁹Khathansha wi hi anyi pahan na keben nmi, athsümeni nshü chala keben mu khe,

²⁰asassen pi kedethsü, ikhaghanenithu wi mukeya tsüpi mathu cü, isathu ma ma leben tsüdi pi hi seng.

²¹Keujüla hi ajühkaghaten wi khangya mehaile kesa chü nu magha-maghang kesü mechu lethu,

²²ihacü keni ya pashü thsülo; tsü keni ya idepfü wina zandhi thsülo.

²³Hi Anyiza kemeten tsü messi keten lina, hi khiela tsüti sa nkesa.

²⁴Hi khiela kebenwa tsü nondi wa nsa,

²⁵nyelela hi keben-keyeng ghena kapvü nsa.

²⁶Hi khiela ghani kewegüwa tsü nkinyi nyelela asha tsikemehaiwa tsü nkinyi.

²⁷Hi mathu nyuwaküle ilen cüzzi sen wa mathu kenyuwakü ghena ikwen nkimang.

²⁸Kesami tsüti kesa tsüna keshü pi meten ncüthu yishü; tsüna Anyiza Kekhang ntsawa tsü meya mvuben.

²⁹Hi khiela ighinyithu na ketizenkesa wi hi n-nong nyelela mathu na ketizenkesa metukeya wi hi nen nsa;

³⁰Hi khiela mathu ya shülo kesa ghena khie nu nsami.

³¹Ighena kekulithu tsüdila hi keshüthangla kijünyi thu ssiya le kesa chüben.

³²Hi kijünyi kewathu cipi ijjen wi chi, nu khiela mathu ya alentonti wi njen thsü.

³³Anyi kepathu na mathu kesami kuthile kiden, isala hi tsü hi kesami nkuthi.

³⁴Hi khiela nyu mang khile ben khe messi nsa; hi khiela ceen ben nyelela nduku wi ben wa nsa, kepaghenanye hi mathu na aghepvü keten tsü messi.

³⁵Thola hi khi keben ha kina cü nten kwe? ajüh tsüdila atsentsa le kesa kishenben. Kekhang ntsawa Anyiza ya hi luneng thsülo. Keujüla hi kematangthu na hi kethen sengho hi keshun jüh tsüna zhüpi ketheng kesü sa nu hi tsü mu lethu,

³⁶hi tsüpi idepfü wi cügi pvü nu immisa kesa nu tsüthu pi kadiliwen ti pi ili wi chi pvü kesa.

³⁷Hi kulikea tsüdi pi Anyiza kiza, nu ma tuwi ili misikhhali pieki ben kesa.

³⁸Keujüla hi ca keten lli tsü ghanfüya, nu ma pvüthu ji khuya lethu —

³⁹keujüla hi alli ciwi shigü keya tsü dsa, isala tsü ca pi shigü kechithu ya ghama wa thsüa—

⁴⁰isalethu awhengsu nu achentha mithon wi kepagha nu aghazüthu ya shigü thsülo. Job jühthu na cendha.