Read Northern Rengma Naga JOB 32 Bible Online

JOB 32 - Northern Rengma Naga bible

JOB 32

¹Job na ma nsamile khvu wa kesalina, meshu kecheng tsüna ma jüh luneng le nkidenla.

²Isala ghang keben meshu kesü ma nyan Elihu kesa tsüna ma leben ketsu kekheneng meyala, kepaghenanye Job na ma khi pi mehai nu Anyiza meshensa wa kesalina. (Elihu tsüna Buz shicübvügha Ram gei wi Barakhel tsa.)

³Ma ma pvüshang meshu kecheng miwila aghepvü. Mathu na mangla Job luneng keya len nmila, nu tsüti kesa wi Anyiza na sazzi keben ti shhughoa.

⁴Elihu na ciwi kebenthu jawi ghanyi ntsawa kesalina tsüdila ajüh kekhidhi tsü hie ben.

⁵Ma khathansha wi meshu kecheng tsüna Job luneng meyala khe aghepvü

⁶nu ajüh khi shagha. Hi ghanyiwa, nu no keqhaiwa, tsalina hi meshen kebenwa pi no kiza messi.

⁷Hi ketanla hi kizala nthu na ajüh kekhiu, imiwi keqhaithu ya nthu kemetsa pi kekizali nsathu yishü le sa.

⁸Isala anyithu miwi gho nu kemetsa pi mathu cü ketenwa tsüna Kekhang ntsawa Anyiza ghamu le.

⁹Anyi pi metsa cü keten tsüna keqhai ghena nye, nyelela mathu ya kemeshonwa chüya thsü nten.

¹⁰Tsalina hi khili nthu ya ijüh kina thsü mvuben; hi meshen kebenwa pi nthu kiza thsülo.

¹¹Nthu na ajüh kekhi wi hi kekheneng nu kina, nu nthu na kemetsa jüh bhakeben wi hi nthu hie.

¹²Hi kiden-kesha ntsa nu kina nan nthu na südhe nkeya zayadha; nthu na Job kekhi jüh tsüna meshon le nkhiladha.

¹³Nthu khati kemetsa bhashiya le khiya mehai nu? Anyiza na Job jüh luneng nchithu yishü, kepaghenanye nthu na sa meyaladha.

¹⁴Job na nthu wi khe hi wi nkhi, isala hi khiela nthu kekhi ti luneng nten.

¹⁵Job, mathu na ajüh wi khang meyaladha, mathu na njüh keluneng nmidha.

¹⁶Mathu na ceen keben jü hi hieben kwe? Mathu na mangla kekhiu nmila ciwi nganben.

¹⁷Nye, hi hi keluneng jüh pi khiden, nu hi mangwa meshenben khe pi no kiza den.

¹⁸Hi ajüh khile kesa mehiechaladha, hi ajüh zan nengya ntendha.

¹⁹Keujüla hi ajüh kekhi tsü nmu lethu, hi kisengtssü ketheü pi akhüti kesü pong ketheng ti nbvüaben.

²⁰Hi tsü hiebenya nten; hi ajüh khiden.

²¹Hi keccücanli hawa wi nyu chhen nten; hi thola kaghane jüh khi nten.

²²Hi nyu kaghane jüh nkhichü, nu hi tsüti sa lethu Anyiza na wan hi meten cüaben.