Read Northern Rengma Naga JOB 33 Bible Online

JOB 33 - Northern Rengma Naga bible

JOB 33

¹Tsalina Job, hi mangwa khile ben khe mehaitsü kina yalo.

²Hi mangwa na ileben wi ben khe khile bendha.

³Ijüh na tsüdila meshon, nu hi atsentsawa tsü khiben.

⁴Anyiza ghamu na hi sahang chi, nu kahang pi hi cü.

⁵No saya mehai lethu hi luneng chilo. No keccücanli jüh kidenya.

⁶No nu hi la Anyiza tuwi makesü, ishinyi qho anisha pi kezhü.

⁷Tsalina no hi kemessi jjügi mangla nmi; hi no pasha nben.

⁸No hawa ha kekhi hi zaya;

⁹“Hi nsazzi; hi mangla kesazzi nsa. hi kesazzi nsa nu kesami nmi.

¹⁰Isala Anyiza na hi meshensa, nu ssikaghashen nu hi pi aghinyi kesü ti sa.

¹¹ Ma assüli pi iccü bhen; ma hi kekuli tsüdila cwen.”

¹²Isala Job, hi no kizaben, no sazzi. Anyiza na anyi tsüdi miwi diki.

¹³No mangkesa na Anyiza na anyi leben-nkagha tsü luneng nkechi ghena ma khimeshü ten nu?

¹⁴Anyiza na ajühkhi nu khineng ben lela, anyi na ma khi kebenwa tsü meshenchi nten.

¹⁵ Aghaja wi anyithu na jen keben wi, Anyiza na aman nu kemanthi wina ajühkhiden.

¹⁶Ma mathu ya ma mangwa khiben khe kina thsüden, nu mathu na ma kitsan kechi wi keqhethiya den.

¹⁷Anyiza na mathu ya nsami thsü, nu mathu ya nkapvü thsüle kesalina ajühkhi den.

¹⁸Ma mathu ya yasakea sa thsü nben; ma keshü wina mathu hangsha cüden.

¹⁹Anyiza na kesakinaa kesun pi anyi cü, kinaa pi ma gwo pong cü nu ma satemeshon den.

²⁰Kesakinaa nyiwa na ma pang nyan nten; atsse kemehai ntsa lela ghang pi anonhi waden.

²¹Ma gwo yasa pi mangla nkenye sa, nu ma gü tsüdila muya mehai;

²²ma keshü yyiwi wa kesau ti saden.

²³Tangnyilo kesü na gho ma kiqalaya mehai— Anyiza nyilo hazar hazar keben jawi kesü na anyithu kekuli pi mathu kiza neng den.

²⁴Nanketizen wina nyilowa na hati khiben, “Ma teshichilo! Ma keshü yyi wi wa nben. Hewi ma khushi cüle ma hangsha kecü na ben.”

²⁵Ma gwo na ghanie nu züneng waden;

²⁶ma khathansha wi kekhie sa khe, Anyiza na ma luneng cüben; ma anonghe pi Anyiza kinyiben; Anyiza na ma ghena pala patemeshon chiden.

²⁷Ma anyithu tuwi hati khiden, “Hi samidha. Hi kemeshonwa nsala, isala Anyiza na hi heisha cü.

²⁸Ma hi keshü yyiwi wa keten wi hi noncca cü, nu hi khili kecu hangben.”

²⁹Anyiza na hawa ha kuli nu kuli neng den;

³⁰ma anyi kesü kahang hangsha cüden, nu kahang nonkeghe pi ma cüden.

³¹Job, khili hi mangwa khiben khe kina lo; ceen ben nu hi ya ajühkhi thsülo.

³²Isala no pala pahan kekhiu na ben lethu, hi ya tsü zaya thsülo; isalethu hi inonghe nu no meshon benle khiaben.

³³Isala nyelethu, ceen ben nu ijüh kina cülo, nu hi khatinu metsa ya ten khe pi no sansi cü na.