Read Northern Rengma Naga JOB 34 Bible Online

JOB 34 - Northern Rengma Naga bible

JOB 34

¹Nthu anyithu na metsa, nu meghe-metsa mtsü; hi mangwa khiben khe khili kina chilo.

³Nthu atsse pampithu kemehai chüyaden; isala kemetsa jüh za keya witsü tsüti sa nten.

⁴Khawa südhe keyau khe tsüna ithu miwi.

⁵Job na ma nsazzi, nu Anyiza na ajühtsentsa sa pi ma ncülale khiden.

⁶Ma keüchi, “Hi khati nu milimesala hi sazzile khiya ben nu? Hi mesa-mena pi keshü ti sadha, isala hi kesami nmi.”

⁷Nthu na kutitanla anyi Job ha ti kesa mudha kwe? Ma khiela Anyiza kekinyikü pi nccüca.

⁸Ma anyi nkemehai kegweghe ma nenden, nu kesamithu gweghe waden.

⁹Ma Anyiza kemeshen niele kekiden tsüna khiela kemehai saya ntenle khiden.

¹⁰Ijüh kinalo, nthu chüshiya ketenthu! Kekhang ntsawa Anyiza na mangwa nmeshon khe tsü saben kwe?

¹¹ Ma anyithu na mangwa sa ten khe tsü kutimen pi cüden; nu mathu na keyaqo pi cüden.

¹²Kekhang ntsawa Anyiza na nkemehai sa nten; ma khiela tho wila atsentsa nkenye sa nten.

¹³Anyiza na anyi pahan wi ma kekhang muya kwe? Anyi pahan na ma pi ayyi kaghangwa sa thsü kwe?

¹⁴Keujüla Anyiza na kahang hathawa tsü khunengya lethu,

¹⁵hangkebenthu tsüdila shü, nu ayyinikhu ceng neng waben.

¹⁶Khili ijüh kinalo, nthu metsaten lethu.

¹⁷Nthu na ketsatanwa Nyiza tsü nkhichi ten kwe? Nthu tsü ma ajühtsentsa kesen nanmeghü tenle meshen ten kwe?

¹⁸Anyiza na kadimithu, kekhang kesenthu meshensa, khathansha wi mathu na ma men nkemi nu gheshighena sa khe.

¹⁹Ma kekhang kesenthu sheikhi nyelela kebanwa nen nu ketha-u shun nten, kepaghenanye ma anyi tsüdi sahang chi.

²⁰Ithu na aghaja wi zuli shüya mehai. Anyiza na ithu whengshi pi nu ithu na dediaben, Ma kekhangthu kekiqa nsenla pathi den.

²¹Ma anyithu na alen khha kewa tsüdi ghang den.

²²Ciwi kejang mangla jang pi Anyiza tuwi kesami nyi kesü kuthikeya nmi.

²³Anyiza na anyithu na ma wi wala ajühkaghaten keten matsü tsü ssan pi nthengla mehai.

²⁴Ma accülikesathu khupi nu mathu kuti kesathu pi chile kesa bha kaketsü nsala mehai.

²⁵Kepaghenanye ma mathu na mangwa sa ten khe chüben; ma aghaja wi mathu pi khala nu pacha den.

²⁶Ma anyi tsüdi muya kemehai wi kesamithu meten cüden,

²⁷kepaghenanye mathu na ma n-niela, nu ma jühkhukechithu tsüdi nkhichila.

²⁸Mathu na ketha-uthu ya Anyiza wi khielo khvu sa, nu ma mathu na kekiqa ghena kekhie zaya.

²⁹Keujüla Anyiza na mangla kulile südhe nchitha sa lela thola ma thenya nben. Keujüla ma ma mmi kuthiya lethu, ithu na kekiqa nmila kesa.

³⁰Mizzatentithu lela mangla sa nu Anyiza nkechü, nyu kepashathu ya mathu miwi kekhang nsen thsüle khenya nkesa.

³¹Job, no no kesami khishi pi Anyiza kiza, nu kesami nsale kesa kishendha ma?

³²No Anyiza ya kesami khi pi no kizalo kesa khiedha ma? Nu no nkemehai nsala le kesa cendha ma?

³³No Anyiza na mangwa sa ten khe tsü n-nen kesalina no Anyiza ya no nmvu kebenwa sa cü benle ghang ya mehai kwe? Südheya keten tsüna no khe hi nye; no mangwa meshenben khe pi ithu kizalo.

³⁴Mejumejü nyi kesüle kesü lela anle khiben; kemetsa nyi ijüh kiza kesüle kesü lela,

³⁵Job na nchüla khiben, nu ma kekhi kesütanla ajjügi nshhugho le khiaben .

³⁶Job khi keben tsüdi meshenchilo; isalethu nthu na ma nkemehai nyi kesü ti ajühkhi tenle kesa chüyaben.

³⁷Ma kahhaghe pi ma kesamithu wwa ben; ithu tsüdi tuwi na ma Anyiza nankeqhe ben.