Read Northern Rengma Naga JOB 36 Bible Online

JOB 36 - Northern Rengma Naga bible

JOB 36

¹Kethankehi nu keujü hi Anyiza mithon wi ajühkhi keben ha kina chilo.

³Hi palakechü na mezaqo; hi hi kechü khipi Anyiza hi sahangkechiwa tsüna meshon le kesa ccüca chiben.

⁴Hi kekhi wi mangla milikemesa nmi; no kemetsa ntsa nyi kesü ntuwi keben muben.

⁵Anyiza na khatila zü nu! Ma thola nkhichi sa nten; ciwi ma nkechü mangla nmi.

⁶Ma kesamithu ya hangben thsü nten, ma keshüthangla ketha-u tuwi kemeshonwa saden.

⁷Ma ketsatanthu khweyaden; ma mathu ya kadimithu ti kekhang senya thsü, nu mathu ya anuphan kinyikü muya thsü den.

⁸Isala keujüla anyithu na mathu kuli ketheng ghena assüli pvü nu ketizensa ben lethu,

⁹Anyiza na mathu kesami nu kekapvü pi ccücaden.

¹⁰Ma mathu ya ma kekitsan kina nu nkemehai wina kheneng bvü thsü den.

¹¹Keujüla mathu Anyiza jüh kina nu ma kekuli sa, isathu mathu na kecca nu kemehai wi hangya den.

¹²Isala keujüla tsüti nsa lethu, mathu na nkechü pvü nu shüaben, nu akuza thenkeghe sen nu keshü yyiwi duaben.

¹³Anyiza nkechüthu na aghepvü benden, nu meten cü lela mathu na kekiqa khie nten.

¹⁴Mathu na acali sa keben wina shü, kejüghekeya kahang pi mathu chachha thsüden.

¹⁵Isala Anyiza na ketizenkesa wina anyi sansi, nu agükeccü sen nu mathu nyon küya thsü den.

¹⁶Anyiza na agükeccü wina no ssi shhughodha, nu no ya yazishu n-nongheya thsü; kedsakejjü pi nmiz pong cü.

¹⁷Isala khili no keyaqo pi no meten ben.

¹⁸Alaa ya no nmechu thsüle kesa nyelela keben ya nlen ntsütson zzi thsüle kesa ghena kiden-keshaya.

¹⁹Kekiqa kekhie tsü nghena kemehaiwa sa cü nben; khilitsü no kezü tsüdi lela no kiqaya nben.

²⁰Aghaja tsüwa kegho tsü nmemvula, mizzatentithu bhatagha keten matsüwa na tsü.

²¹Nkemehai wi nwale kesa ghena kiden-kesha yalo; n-gükeccü kesunkechi tsüna no ciwi na shhuya thsüle kesalina.

²²Anyiza kekhangwa tsüna khatila di khe meshen yalo; ma tsüdi miwi kesansi kedi ntsawa.

²³Thola mangwa nsathu yishü khe pi Anyiza kizaya nben nyelela nkemehai kekuli ghena ma khimeshüya nben.

²⁴keshüthangla ma kekuli ghena ma seng ghoben; no la ma nsengthu yishü.

²⁵Anyi tsüdila ma mangwa kulichi khe muyadha; isala ithu na kelensie wi ben nu tsü ghang ben.

²⁶Ithu na ma kediwa tsü chüshithaya nben, nyelela ma mapi siyakhi nben.

²⁷Ayyiwi atssü khuya nu pi atsankegho kejüca ceng chi cü ketenwa tsüna Anyiza.

²⁸Ma akulukeshü wina atsankegho yala anyi tsüdi ghena keghüzighe chi thsü den.

²⁹Anyi thola akulu na khati kuli nu Anyiza keben pen wi atsan na khati shigü ten khe nchü.

³⁰Ma atsancwe kesun pi atssan tsüdi wi chi, isala atssükedone kedhuthu tsü jang ben den.

³¹Hatinu ma anyithu ghanja, nu kedsakejjü pi pongkemeni sa cüden.

³²Ma ma kwen pi atsancwe ghantenya, nu tsü ya kemtsü tsü ghonlo khi chiden.

³³Atsankeshigü tsüna caghamo sagho keten pi khichiden nu asahangthu na tsüna gho tendha le kesa chüyaden.