Read Northern Rengma Naga JOB 37 Bible Online

JOB 37 - Northern Rengma Naga bible

JOB 37

¹Caghamo na ileben sapi dhundhun ntsa sa thsü ben.

²Nthu tsüdila Anyiza hhai, nu ma pang wina atsankeshigü shhugho kebenwa tsü kina chilo.

³Ma atsancwe kesun pi atssan thenkeghe sen ayyi ccügwen kesü wina wa kebenwa kecu wegü chiden.

⁴Tsaseng wi ma kemagha hhai, ajenkebenwa tsankeshigü hhai tsü zaden, nu tsüti kesa tsüdi wi atsancwe chiden.

⁵Anyiza jühkhukechi wina qhethiketen kesa, ithu na chüshi nkeya amankesathu saden.

⁶Ma aghola ya ayyi miwi qancalo ajühkhuchiden, nu atsankeshathi kesunsha chiden.

⁷Ma anyithu kekuli sengho asakhen sa cüden; ma saya kemehai pi mathu ccücaden.

⁸Aghangsathu na mathu ku wi waden,

⁹caghamo meghü na acülawa na shhugho, nu aghawa na kemejeng mo sen ghoden.

¹⁰Anyiza hathakeshhu na atssü patekicü, nu tsüthu pi aghola ceng cüden.

¹¹Akulukeshü wina atsancwe sa dugho,

¹²tsüthu na Anyiza kenen wina kuliden. Tsüthu na ayyi kahe wi Anyiza jühkhukechi tsüdi saden.

¹³Anyiza na atsankegho kesun pi ayyi ten thsü; ma tsü kesun pi ithu meten, nyelela ma kenen pi ithu ccüca laya mehai.

¹⁴Job, matsü kesü keu ceen ben nu kinalo; Anyiza kekuli amankesa tsü meshen chilo.

¹⁵No Anyiza na khati ajühkhuchi, akulu wina atsancwe sa chi ten khe chüben ma?

¹⁶No akulukeshü na khati atssan wi pong den, Anyiza sapichü mankesa kekuli tsü chüben ma?

¹⁷Nye, khathansha wi acülawa meghü na ayyi mosha khe tsü keyeng ketanla n-güccüben.

¹⁸No Anyiza kiqa pi atssan zankechu thsü, nu tsüpi amighe kekhang ti saya mehai kwe?

¹⁹Mang pi Anyiza kekizau khe pi ithu sansi cülo; ithu leben wi kaghacang; ithu na mangla kekhi nmi.

²⁰Hi Anyiza ssinu keccünenglilo khi nben; mangsale ma hi yasalo kesa matsü pi ma cü nu?

²¹atssan wi kethangwa tsüna kizali ben, ithu na tsü ghang le kesa kiza mtsü; nu ameghü na atssan tsü pfü temethadha.

²²Suna kewegü ti kesa kesü aghawa muben, nu Anyiza nyankethang na ithu pong ben.

²³Anyiza kekhangwa tsüna di mtsü, nu ithu na ma kete wi waya nben; ma anyi ssinu kekuli wi tsatan nu meshon.

²⁴Tsüdila ma messi kesa tsüna amankesa nye, nu ma mathu na metsa benle sa ketenthu tsü nkhichiladen.