Read Northern Rengma Naga JOB 38 Bible Online

JOB 38 - Northern Rengma Naga bible

JOB 38

¹Tsaseng wi Apvüwa na caghamo wina Job ccüneng.

²No thowa le no nkechü nu ajüh kaghacangthu khipi hi kemetsa jjügi keüya mehai nu?

³Khili shagha kempvüza nyi kesü ti hi no keü kebenwa ha luneng chilo.

⁴Hi ayyi sa kechi tsüwi no ciwi ben kwe? Keujüla no tsü kecu chüben lethu, tsü cüki pi hi kizalo.

⁵Thowa na ma keti khacu saben khe südhechi nu? Thowa na tsü kekitegü sachi nu? No tsü keluneng tsüdi chüben ma?

⁶Mangwa na ayyi kezungki donbvüthu tsü pieki sen ben nu? Thowa na ayyi ccügwen donbvüwa tsü pi sheng nu?

⁷Tsü ghanan tsantheghi wi ghotsithu na gweghe akhwisa, nu tangwi kahangthu na anonghela jisha.

⁸Thowa na ayyi non wina pvükhhi shhugho keten atssükedone khweti-jenka tsü khenya nu?

⁹Akulukeshü pi atssükedone shanbhon, nu kejang wi tsü meju kesawa tsüna hi le.

¹⁰Hi atssükedone ghena aggü kesü pi sheng, nu tsüpi kaghapeng-jenka khen ketheng sengwi tsü chia.

¹¹Hi tsü kiza, “Tsü meten ketan khe tsü miwi nwala! No kekuli kekhang tsüna hewi ngan wa nsathu yishü.”

¹²Job, no kahang wi atsathang kesüla kiza nu tsantheghi shhugho thsüdha kwe?

¹³No ahza pi tsantheghi cü nu ayyi ghanten thsü nu gheshighenathu na mathu kekuthipen wina kedheggü thsüdha kwe?

¹⁴Aghanan kewegü na yyishiphon, nu yyiketijüthu pi athsü kemesheng ti shagha thsü, anisha miwi mechantsi kejeng kesü ti mechanshu ben.

¹⁵Aghanan kewegü na gheshighenawa ghena kiza mtsü nu keyasa kekuli wi mathu kekheneng den.

¹⁶No atssükedone kebvüpen kedhu wi tsü wa nandha kwe? No atssükedone miwi alentsen nandha kwe?

¹⁷Anyi keshüyyi kejangwa ghihiekepen kaghapeng-jenka tsüpi no ccücadha kwe?

¹⁸No ayyi ha khacu khe chüben ma? Keujüla no chüben lethu hi luneng chilo.

¹⁹No kethang hana khiewa na gho, nyelela kejang keshhughopen tsü chüben ma?

²⁰No tsü keni na khathu wi waya nyelela manyi kesunneng keya pi ccüca mehai ma?

²¹No sayaben kesa hi chütiben, kepaghenanye no ayyi sa kechi wina ciwi ben, nu qhai ntsa sadha!

²²No atsanqai ketheng penthu wi hi aghola, nu aghayi pi chiketheng tsü hhainandha kwe?

²³Hi tsüthu pi agükeccü, aghikesa nu aghi tsüwi ghena kiden theng.

²⁴No ghani shhugho ketenpen wi nyelela nishuwa meghü na keshhughopen wi wadha kwe?

²⁵Thowa na atsankegho kesun chile kesa len chhü, nu atsanphagha len sametha chi nu?

²⁶Thowa na anyi thola nkahangpen wi atsan pi gho thsü ten nu?

²⁷Thowa na atssü pi ayyi keqha nu dighe keben tsü zügü chi nu aghang shigü shhugho thsü nu?

²⁸Atsankegho nyelela akejan tsüna aba ben kwe?

²⁹Thowa na aghola nu ajangcü manyi jja,

³⁰ma atssü pi alon ceng, nu atssükedone sapi mejeng thsü nu?

³¹No Pleiad ghotsithu tsü bhenghuya nyelela Orion ghotsi bhen ketheng tsü lishaya mehai kwe?

³²No matsütsü wi ghotsithu len tsütson, Bear ghotsi keti nu kizza lentsütsonya mehai kwe?

³³No atssanthu ghansen ben keten yen tsü chü, nu no tsüthu pi ayyiwi senya mehai kwe?

³⁴No jisha nu ahza pi akulukeshü cü, nu tsüna atsangho pi no ten thsüya mehai kwe?

³⁵Nu keujüla no atsancwe wi cwen chilo kizathu, tsüna no wi gho “Njüh kekina wina” khiya ben kwe?

³⁶Thowa na khathansha wi Nil Ghaku na atssüti ten khe ibiswa[15] kiza, nyelela thowa na awegü ghapon wi atsanghole sa benle kizaten nu?

³⁷Thowa na metsa pi akulukeshü siya, nu tsüthu na atsankegho keshusha thsü,

³⁸atsankegho na ayyinikhu satekhang pi matsen sa thsüten nu?

³⁹No ssensitemithu dsaya thsüle atsse bhaya, nu ma zza ghama kebenthu pvü sa cü,

⁴⁰mathu na alonku nyelela mathu ku wi ben, nu hie keben wi tsüti saten kwe?

⁴¹Khathansha aduwe kizzathu na ghama nu kegoe nu ma zzathu na hi wi atsse khie khe pi ghanja cü ketenwa tsüna thowa nu?