Read Northern Rengma Naga JOB 39 Bible Online

JOB 39 - Northern Rengma Naga bible

JOB 39

¹No ayikha mijü na kusi ca ten khe chüben ma? No ameshü keca ghang nandha kwe?

²No mathu matsü khathu azzatsü pvü ten khe chüben ma? No mathu keca tsü chüben ma?

³No mathu na khathansha akhhutsüdu nu mathu zza ca pi ayyi wi chiten khe chüben ma?

⁴Agheja wi mathu zza na zügü yathu; mathu na bvü nu gho neng nten.

⁵Thowa na agheja gadathu ya mathu kemeshen saya kemehai khuchi nu? Thowa na mathu lisha nu kegoe thsü nu?

⁶Hi ayyikeshü pi mathu jjen salo pi cü, nu mathu ya amcü deshentijü wi hang thsü.

⁷Mathu na ahhaighü kesha nyunuti temeja wi ben, Thola mathu sansi nu meten pi kuliya thsü nben.

⁸Ayikhathu tsüna mathu tsse kiyapen, ciwi mathu na aghang kemejjü katsüha lela bha dsaden.

⁹Hadasi kesü na no ghena kuliya ben kwe? Ma ghaja kesü lela nmesü jjen wi benya ben kwe?

¹⁰No ali pi kesü hupi allica thsüya mehai kwe? nyelela ma ya nlli wi acaqha kesü zan thsüya mehai kwe?

¹¹No ma kezü tsü nondi nu ma no kekuli kekiyan kesa tsü ghayenya mehai kwe?

¹²No ma nlli kewwi tsü pvügho nu n-niegi wi asu kesagho tsü ghacengya mehai kwe?

¹³Awaketiwa gisha na khatila kaghajila kebhagha ten nu! Isala awaketiwa kesüla atssüwa ti pigheya nben.

¹⁴Awaketiwa na ma ghatsü pi ayyi wi teshi ten ayyi keyeng na tsüthu ghong thsüle kesalina.

¹⁵Ma nyu na tsüthu cücha nyelela aghangsa na tsüthu pacha keben tsü khichi nten.

¹⁶Ma ghatsüthu tsüpi ma ji nkenye ti saden, nu ma kekuli tsüna yasa lela makesasa saden.

¹⁷Hi ma pi kejüphon sa thsüa, nu kemetsa pi ma ncüla.

¹⁸Isala ma bvü shagha lethu, ma goru nu kessiwa nankeqhe cüya mehai.

¹⁹Job, goruthu sapi zü cü nu mathu sunkenye kesie pi kecüwa tsüna no kwe?

²⁰No mathu sapi ashiqathu ti benki thsü nu mathu mitsan hhai pi anyi pateqhe thsü kwe?

²¹Ayyiketijü wi mathu kenen sa accü pi ayyi wheng; mathu kezü tsüdi sen nu aghi wi wa.

²²Mathu na kemessi jjügi nchü, nu njünnu na mathu jügü nengya nben.

²³Mathu kessithu na pvü keten aghitsanqaithu tsüna aghani weneng pi phüphü saben.

²⁴Goruthu na nong pi kedheggüla atuwi bvü; khathansha wi tutuwa khou chi khe mathu na ceen ben meya laden.

²⁵Tutuwa kekhou kaghapen mathu mitsan hhai sa; mathu tetsaki npi kewa wina aghi han zaya mehai, nu mathu na kedithu ahza kejisha hhai zaden.

²⁶Cencüggü kesü na ma gisha zanshigü pi acülawa peghe keya wi khati npighethu yishü khe no wi chüyaten kwe?

²⁷Amumu kesü na ayikha kemisithu wi ma ghacen ghüle kesa ghena no wi khi kechi hie ben ten kwe?

²⁸Ma alonshi kemisi ntsathu wi ma jjen sa, nu ayikha pang ketsu pi ma khweti saden.

²⁹Ma ciwi pala pahan ghan dsale kesalina akete nu kelensie wila ghang ben den.

³⁰Amumuthu na akamangthu tsü vü, nu ma zzathu na ajjü jjüden.