Read Northern Rengma Naga JOB 4 Bible Online

JOB 4 - Northern Rengma Naga bible

JOB 4

¹Job, hi ajüh khithu no n-nenla ben kwe? Hi ceen benya ntendha.

³No anyi kejon sansi, nu ahacü nkezüthu satezü cüdha.

⁴Anyithu na accü meshü, nkhang nu ncha-mnan wa kesa wi njühthu na mathu sapi kempvüza sa nu nganya thsü.

⁵Khilitsü agükeccü tsüwa tsüna ndulu sadha, no tsü chüshiya le kesa dhu mtsüdha.

⁶No Anyiza kinyi gho, no kahang wi kemeshensa nmila gho; tsalina no kenondi nu no kaghang keben-u sa.

⁷Khili tsü meshen neng chi nanlo. Khiewa ketsatan nyi kesüla agükeccü metuya khe kesüla khi nanlo.

⁸Hi anyithu na nkemehai lli ca nu gheshighena pi amacü ti vvü kechi mu; khili mathu na gheshighena nu nkemehai wwiya ben.

⁹Caghamo kesü ti Anyiza na ma leben ketsu wi mathu yasaden.

¹⁰Anyi gheshighenathu na ssensitemithu ti magha nu aghena den, isala Anyiza na mathu khen nu mathu yha pashü den.

¹¹Ssensitemithu na mangla ghan nu dsa nkeya ti mathu na shü, nu mathu tsangathu na bvüzighedha.

¹²Kuti wi ketsijüh nkhena khi gho, nkhena ntsa kesalina hi nza lazzi.

¹³ Tsüna ayencenpvü kesü ti hi kejen pakivvüa.

¹⁴Hi kedheggü nu kecügü; messi pi igwo mabenla kedheggü.

¹⁵Ameghü kesü gho immi mochhi, nu hi keqhethi pi issen la mton.

¹⁶Hi pala pahan ciwi ngan keben mu; hi ghang chi isala tsüna mangwa khe khi meya. Tsaseng wi yangyi kesa witsü hi ahhai kesü zaya:

¹⁷“Anyi kesüla Anyiza tuwi tsatanya mehai, ma sahangkechiwa tuwi methaya mehai kwe?

¹⁸Anyiza na tangwi ma maghathu nondi meya, ma ma nyilothu wi lela kesazzi muden.

¹⁹No tsü ma anisha pi sahangkeya kesü, ayyinikhu pi sa keya tsüpi amasha kesü ti cücha kesawa tsü nondiya benle ben kwe?

²⁰Ithu na aghanen wi hang benlaya mehai, isala npi keminu jüwi nchüla shüden.

²¹Ma ithu keben tsüdi sen bvüa, nu ithu na kemetsa nmila keben wi shüden.”