Read Northern Rengma Naga JOB 41 Bible Online

JOB 41 - Northern Rengma Naga bible

JOB 41

¹ No anga kenniji pi Leviathan nniya nyelela ali kesü pi ma mili huya mehai kwe?

²No ali pi ma mitsan ku wi chi nyelela adhasü pi ma hakheng vüya mehai kwe?

³Ma bvü thsülo no wi keshükeneya ben kwe? Ma no wi nanketizen khie ten kwe?

⁴Ma no ssinu ajühkecen kesü sa, nu anuphan no kekuli sale khishi ben kwe?

⁵Ma hupi no kenen awa kesü ti saya, nu pala pahan pi nmaghalethu kenen sa keten ti saya ten kwe?

⁶Anga kaghanthu na ma shüshengya ben kwe? Asenkesathu na ma denthi pi jeü ben kwe?

⁷No anga kekicunji pi ma li kicun, nu amighe ghazü pi ma li kecun cüya mehai kwe?

⁸Kuti ma kidhen nanthu no mangla tsüti sale kiden neng nbendha; no ma ssikesali kesa tsü mali nbendha!

⁹Anyi kesüle kesü lela Leviathan kemuwa ma kempvüza nmila ayyi wi khuliduaben.

¹⁰Ma khathansha shagha khe aghe nmehai; thola leben-jjan nu ma tuwi nganya nben.

¹¹Thowa na ma ssisa nu mangla nsala benya mehai nu? Ayyi tsüdi wi anyi thola tsüti saya nben.

¹²Hi ya Leviathan ccüthu cüki, nu ma khatila di nu zü khe khipi no kiza thsülo.

¹³Thola ma kemeju ameiwa tsü zanqhe nyelela magwo mejupvü keten tsü kecun chiya nben.

¹⁴Thowa na ma hakheng wi ayha nankemessi pi pong pvü keten tsü sapi ka thsüya mehai nu?

¹⁵Ma ghatsü na makü pi alenlen sa kedakili pi alon kekhang ti pvü den.

¹⁶Kesü kesü kedakili khvu sa, nu ahathakeshhu lela majü wi duya nben.

¹⁷Tsüthu tsüdila kedakili khvu sa, nu khiela tsüthu shizigheya nben.

¹⁸Ma ahthe sa kechi wi kewegü na kizali sa, nu ma nyon na ghani keshhugho ti wegü chiden.

¹⁹Ma pang wina anniqhe chi, nu kizali ma lenlen sa shhugho den.

²⁰Ma mitsan wi annikekhu na apfü kekhu wi kepagha pi annibhon wi kechi ti shhugho den.

²¹Ma hathakeshhu na anniqhe shagha; annikeqhe na ma pang wina shhugho den.

²²Ma sun na khang ntsa, nu ma kemetuthu tsüdila qhethi den.

²³Ma hyu wi nkekhang pen kesüla nmi; tsüna khang nu amighe ti zü ntsa.

²⁴Ma leben kezü na kemessi mangla nmi, kenyeggülon kekhang ti zü ntsa.

²⁵Khathansha wi ma shagha khe, kezü ntsa lela pateqhe, mathu na messi pi mangla sa meya laden.

²⁶Ciwi njünnu kesüla pi süchiya nben; apie, alakusü, nyelela amighe ketsu kesüla pi ma patenaya nben.

²⁷Amighe tsüna ma ghena amagi kaghaba ti, nu lezza na achan kemme ti kesa.

²⁸Alakusü kesüla ma sapi bvü thsüya nben; alonthu pi ma kekicen tsüna amagi be kesü ti.

²⁹Ma ghena tsü pala kewhengji tsüna amagi kesü ti, kusi anyi apie pi ghonchi khe ma nankeqhe den.

³⁰Ma pvü wi maküthu tsüna apfü kegi ti kesa; tsüthu na asu kaghacengchan[18] kesü ti anisha pvükhhi shhugho den.

³¹Ma atssü kegilli ti atssükedone mphügüshi nu tsüpi apfü kesü wi adeli gilli keben ti saden.

³²Ma ma sengwi alen wegüthsü teshichi, nu atssükedone pakethu pi mikidhi chiden.

³³Ayyiwi mangla pi ma ghapekeya nmi; ma kemessi mangla nkemi aghangsa kesü.

³⁴Ma aghangsa kekapvü ntsawa lela khichi nten; ma aghangsa tsüdi jawi kadimiwa.