Read Northern Rengma Naga JOB 42 Bible Online

JOB 42 - Northern Rengma Naga bible

JOB 42

¹Tsaseng wi Job na Apvüwa lunengchi.

²Apvüwa, no tsüdi miwi la kekhang ntsawa; no samvu keben tsüdi saya mehai kesa hi chüben.

³No hi mangla nkechü wi khatila leben-jjan, nu no kemetsa jjügiwa tsü keüben nu kesa keü. Hi pala hi chüshi nkeyathu cüki khi, amankesa chüya le kesa ighena di mtsü.

⁴No ajühkhi keben wi hi kina, nu keü kechithu tsü luneng nanlo hi kiza.

⁵Kheni tsüwi nyu mangwa hi kiza khe tsü chü, isala khilitsü hi ketanla inyon pi no muyadha.

⁶Tsalina hi ijühkekhi tsüdi ghena jüghedha, nu ayyinikhu ayyiwen wi kuweng, nu leben khapeghe benle.

⁷Apvüwa na Job wi ajühkekhi cen sengwi ma Elifaz wi khi, “Hi no nu npvüshangwa keni miwi leben tsu ben, kepaghenanye no kecheng na imaghawa Job na kesa ti icüki tsentsawa nkhi.

⁸Khili amesü süpon tagü nu khaghaneni süpon tagü sen nu Job wi wa nu tsüthu pi nthu ketanla nthu hhansha salo. Job na nthu ghena khie chithu hi ma kekhie luneng cü nu nthu kepvü qo-u wi kejüghe meya thsüla ben. Nthu na ma kekhi ti icüki tsentsawa nkhi.”

⁹Elifaz, Bildad, nu Zofar mathu na Apvüwa kekiza ti sa, nu Apvüwa na Job kekhie luneng cüa.

¹⁰Tsaseng wi Job na ma pvüshang kecheng ghena kekhie sa kechi wi Apvüwa na ma sapi mehai kayi nengchi nu hatuwi ma keben kishen keni jupi ma cüa.

¹¹Job cünyuthu nu ma tssüggüthu nu ma pvüshang sa keghothu tsüdi ma hhainan gho nu ma jjen wi ma ssinu mishu. Mathu na Apvüwa na agükeccü sengho ma miwi kechi tsüdi ghena ma ketizen nu leben sa ketecca jüh khichi. Mathu kesüsü tsüdi apisa pahan nu suna kwenzza qhan pi ma cü.

¹²Apvüwa na atuwa sawegü pi ma kecü miwi lela ma kahang sakhen wiwa sawegü ji kayi pi ma cü. Job na khaghaneni hazar taghamejü, sunsiesa hazar tugho, amesüsi hazar keni, nu gada hazar kesü na ben.

¹³Ma atsa tagü nu anga kecheng ba sa.

¹⁴Ma nga keqhaiwa nyan pi Jemima, keniwa pi Kezia, nu abvükhenwa pi Keren Hapukh[19] ciya.

¹⁵Ciwi ayyi maben wila nzathu thola Job ngathu ti atsikemehai nmi. Mathu ba na mathu ya mathu baghathu gweghe nu keben-keyeng muya thsü.

¹⁶Job na haseng wi amapi meza nu jügha hang, kesie hang nu ma tsanga tsangathu nu tsüthu tsa- ngathu la mukeya sa.

¹⁷Isanu ma qhai ntsawa sa nu shü.