Read Northern Rengma Naga JOB 5 Bible Online

JOB 5 - Northern Rengma Naga bible

JOB 5

¹Jisha nu ci nanlo, Job. Nu thola nushala nye khe kina nanlo. No khapeghe nu tangnyilo kesü wila waya ben kwe?

²Leben-pegü pi agüccü nu shüle kesa tsüna kejüphon, nu ma jjügi nkemi kesü le.

³Hi kejüphonthu na apvü-nsala keben mu, isala hi wan kishenkecü khie pi mathu jjen wi chicü.

⁴Mathu tsathu na khiela apvü-nkesa muya nben, thola ajühkaghatenpen wi shagha mathu sheipi le sa nten.

⁵Kaghamathu na kejüphon ji yangdsaketenthu asu, aghazü jawi shigü keben lela dsa ben, nu dighe ketenthu na mathu keben-keyeng tsü ghang pi anyon ghopvü ben.

⁶Nkemehai na ayyi miwi shigü nten, nyelela kekivvü na ayyiwi na shigü shhugho nten.

⁷Tsüti sa nten! Ithu ketanla agükeccü sengho ithu miwi chiyaden, annikhala na annikeqhe wina akulu wi ki.

⁸Hi no sale kesa tsü Anyiza wi kheneng wa kaghatenjüh pi ma tuwi khi kesale.

⁹Ithu na ma pala kedi kuli keten tsü chüya nben, nu ma amankesa kekuli tsüna kenten nmi.

¹⁰Ma atsankegho kesun pi ayyiwi chi, nu atssü pi alli zügü chiden.

¹¹Anle, satemeni ketenwa pieki cü, nu anonkeghe pi qai ketenthu tsüdi cü ketenwa tsüna Anyiza le.

¹² Ma khapeghe-khaja ketenthu cho pakhakuli, nu kemetsathu cho wina mathu die yaden, isanu mathu kekuli mangla haicen meya thsüle kesalina;

¹⁴mathu na ghanan-lapvü wi lela kejang wi ti ketsü den.

¹⁵Isala Anyiza na keshü wina ketha-uthu hangsha cüden; ma kahhatu nyi mathu kepasha wina hangsha cüden.

¹⁶Ma kaghang pi ketha-uthu cü, nu gheshighenathu ya ceen ben wa thsüden.

¹⁷ Anyiza na ma satemeshon cü ketenthu anonkeghe ntsa! Ma no kha chithu nleben-magha nsala.

¹⁸ Anyiza na ma ayisü pvü thsü kethengthu tsü qhan cüden; ma kwen pi mesa-mena cü, nu ma kwen pi tsü sapi mehai cüden.

¹⁹Ma matsü tsüdi wi no patena ketheng wi hangsha cüden;

²⁰kusi azeng na gho khe ma no ya hangya thsü den, nu aghi wi keshü wina no hangsha cüden.

²¹Anyiza na aghükesa wina no kekasha cüden; kededi kegho wi ma no hangsha cüden.

²²No yasayala nu kaghama nankeqheaden, nu aghangsa nkemehaithu messi nben.

²³No keca llithu witsü alonshi na ben nben; aghangsa nkemehaithu na no ssikaghashen nben.

²⁴Isanu no anithsüjjen wi yazishu ben yaden; no khaghaneni ghang chithu mangla nkesa muyaben.

²⁵amou wi aghangwa kejon keben tsüti no atsangathu kejon ben yaben.

²⁶Alli kewwi tsü kecu awhengsu na nyün ben keten ti, no hangwa no keqhai tsü cuben.

²⁷Job, ithu na matsü kesie wila kekaketsü sa ghang nu ha chüyale. Ha ntsakhiwa le, tsalina khili ha yayalo.