Read Northern Rengma Naga JOB 8 Bible Online

JOB 8 - Northern Rengma Naga bible

JOB 8

¹No asakhen sala ajüh meghü sho thsü ben kwe?

³Anyiza na atsentsawa papheghe nten; ma khiela kemeshonwa tsü nsala nten.

⁴Ntsangathu na sami pi Anyiza matang thengla metsi, tsalina ma mathu na keya qoju kemeten pi mathu cüdha.

⁵Isala khili kheneng Kekhang ntsawa Anyiza ccüneng yalo;

⁶no atsentsa ntsa sa nu metha ben lethu, Anyiza na gho no kiqa cüben, nu njjenku saneng pi nkutimen sa cüben.

⁷No keben-keyeng bhatagha kesathu tsüdila pi Anyiza na haseng wi pi no cü keten tsü ghape meyala ben.

⁸Matsü kesü kheni kemetsawa tsü bha nanlo; ithu bathu na atsentsa chükeya tsü meshen chilo.

⁹Ithu kahang hana milute, ithu na mangla nchütha le; ithu na akekhwen na ayyi pvüdhi wa keten ti le.

¹⁰Isala kheni kemetsathu ya no sansi thsülo; mathu na mangwale khichi khe tsü kinalo:

¹¹“Ahuphonthu na atssü nkemi pen wi shigüya nten; awen nkenye wi khiela tsüthu muya nten.

¹²Atssü na keqha lethu, tsüthu na atuwa sa waweng den, zza mtsü nu wipi npi kesen qo wina.

¹³Anyiza nkechüthu na ahuphon tsüthu ti le; kuti Anyiza mali lethu, mathu kaghang na nmila den.

¹⁴Mathu na saghabvü-zi nondi den.

¹⁵Keujüla mathu na saghabvü-zi kesü miwi keleki lethu, tsüna mathu pvüya mehai kwe? Mathu na tsü maha lethu, tsüna mathu kiqa pi nganya mehai kwe?”

¹⁶Anyi nkemehaithu na ghani geki wi kepagha ti shigü shagha den, kepagha na asanku wi shigü bhon keten ti le.

¹⁷Tsüthu ghazanthu na alonthu kejikevüli, nu alonshi tsüdi kaki khvu yaden.

¹⁸Isala tsaseng wi tsüthu pfü yaden, thola tsüthu na ciwi benketen le kesa chü nben.

¹⁹Anle, anyi nkemehaithu nonkeghe maben na tsü le; khili tsü kepagha na gho mathu pen nkayadha.

²⁰Isala Anyiza na khiela leben tsentsa sa ketenthu yisha nben, nyelela khiela kekiqa pi anyi nkemehaithu cü nben.

²¹Ma no ya keqhe nu jisha nengya thsü den,

²²isala ma kejüghekeya sengho no nanmeghü ketenthu cüden, nu gheshighenathu jjen na nmiladen.