Read Northern Rengma Naga JOB 9 Bible Online

JOB 9 - Northern Rengma Naga bible

JOB 9

¹ Anle, hi hatuwi tsüthu tsüdila zayadha. Isala anyi kesü na khatinu Anyiza tuwi ma kaghatenjüh pi khangya mehai nu?

³khatinu anyi kesüla ma ssinu keccücanliya mehai nu? Ma ajjügi hazar hazar pi keüya mehai, tsüna anyi thola luneng nkeyacha jühthu.

⁴Anyiza na metsa nu khang ntsa; thola shagha ma matangya nben.

⁵Ma kitsan nchila ayikhathu pakuli den, nu alebenketsu wina tsüthu yasa den.

⁶Anyiza na ameghükuju kesun chi, nu ayyi zankeju chiden; ma ayyi tsüki keben donbvüthu tsü zankeju chiden.

⁷Ma aghani nshhugho thsüla, nu aghaja wi ghotsithu ya nwegü thsülaya mehai.

⁸Thola Anyiza kiqa pi atsanshigü nyelela atssükedone wi ghassübvü geshi cüden thsü nten.

⁹ Anyiza na ghotsithu pi atssan wi hagi — nu tsüna Bear, Orion nu Pleiad le kesa, nu acülawa ghotsithu tsü.

¹⁰Ithu na ma pala ketiti kuli ketenthu tsü chüya nben, nu ma amankesa kuli ketenthu tsüna asakhen nmi.

¹¹Anyiza na pvüdhi waden, isala hi mu nben.

¹²Ma mangwa yamvu khe yaden, isala thola ma khenya nben; thola kempvüza sa nu “No mangwa saben nu?” isa ma keüya nben.

¹³Anyiza lebenketsu tsüna keshüthangla benden. Ma ma ghinyithu pachaden. Thowa na Rahab,[9] atssü kedone ghassübvüwa tsü kiqaten khe ma tsü shun den.

¹⁴Tsalina hi khati ajühthu bha pi Anyiza lunengchi nu?

¹⁵Hi nsazzi lela, hi saya kemehaiwa tsüna ijühkaghaten ketenwa, Anyiza wi hi nanketizen keshükene kesa tsü ketanle.

¹⁶Isala ma hi ya ajühkhi thsü lethu, ma ijühkina ben le kesa nondiya nben.

¹⁷Ajjügi mangla nkemi wi hi kihhe, nu pacha le caghamo kesunchi.

¹⁸Ma hi ya ihathashhu meya thsü mvu; ma aleben-kedaggü pi hi kahang pong cüa.

¹⁹Hi mataghang sanan kwe? Mataghang Anyiza meten nanla? Hi ma ssinu ajühkekaghatenpen tuwi wala? Isala thowa na ma pi wa thsü nu?

²⁰Hi nsami nu jühtsentsa saben, isala ijühthu tsüna kesazzi ti zaden, nu hi kekhi tsüdila hi meshensa keben ti.

²¹Hi nsazzi, isala hi tsü nmeshendha. Hi hang pi igüccü wadha. mangla nsale; nsazzi le sazzi lela, Anyiza na ithu yasa ben.

²³Khathansha wi nkesazzi nyi kesü na zuli shü khe Anyiza na nankeqhe den.

²⁴Anyiza na ayyi pi gheshighenawa cüden. Ma pendhenyi tsüdila sapi anyon nmula thsüa. Nu keujüla Anyiza na tsü nsa lethu, thowa na nu?

²⁵Itsathang tsüwa na waben, isala tsü kesüla kemehai nmi.

²⁶Hi kahang na ahun kembhi ntsa ti, amumu kesü na amejü ghan le juchi dugho keten ti.

²⁷Keujüla hi inonghe nu hi kinaa tsü maliale sa lela, ketizenkesa na imiwi gho hi pong neng den; Anyiza na hi pi kesazzi nyi saben le kesa hi chüben.

²⁹Hi pi kesazzi nyi saben lethu, hi mangsale kivvüben nu?

³⁰Sapuno kesüla hi kesamithu samethakeya nmi.

³¹Anyiza na hi pi ayyiku kenenkagha wi khala chidha, nu ithsümeni lela ighena jüghe wadha.

³²Keujüla Anyiza ha anyi lethu, hi ma lunengya kesa; ma ishinyi ajühkekaghatenpen wi wa nu ishinyi kekitagha südheya kesa.

³³Isala thola ma ishinyi jüwi alenkesa nyi nmi— thola Anyiza nu ijühkaghaten keya nmi.

³⁴Kemeten pi hi kecü tsü teshi yilo, Anyiza! No kemessiwa tsü sen nu bvü yilo!

³⁵Hi messi nben, hi keccünengli den, kepaghenanye hi ketanla ileben chü ben.