Read Northern Rengma Naga ZAKECI 10 Bible Online

ZAKECI 10 - Northern Rengma Naga bible

ZAKECI 10

¹O APVÜWA, mangkesa na no temeja ben nu? Ithu gükeccü wi mangkesa na kuthi ben nu?

²Anyi nketsatan nyi na kapvü, nu ketha-uthu meten-mesha; aca sapi mathu die yaden.

³Nketsatan nyi na nkemehai kenmvu wina kapvüden; apvükemene nyi na nyu kishencü, nu APVÜWA yamvu nten.

⁴Nketsatan nyi na APVÜWA khichi nten; ma kekapvü wina Anyiza meshen pi mangla nkenye saden.

⁵Nketsatan nyi kesü kekuli tsüdi wila mehai yaden. Ma Anyiza na ma jühkaghaten keten tsüla chü nten; ma ma ghinyithu tsü nankeqheden.

⁶Ma ketanla ma wi khi, “Hi mangla sa nu qanca meya; agükeccü mu meyacha.”

⁷ Ma jühkekhi tsüdila nyu kishenkecü, milikemesa, nu patekemessi pong ben; ma wan nyu nankemeghü jüh, nkemehai khiden.

⁸Ma anyi kesazzi nkemithu tsü pathiale, anyu wi kuthi nu tsüthu tsü hie ben den, ma kekuthi wina kekiqa nkemithu tsü cwen ben den;

⁹ma ssensitemi ti kekuthi pen wi ben nu nyu hie ben den. Ma ketha-u tsü cwen ben den; ma ca kedie wi mathu ghanya, nu zan neng sen bvüden.

¹⁰Kekiqa nkemiwa pacha pidha; gheshighena kekhang na mathu miwi khangyadha.

¹¹Nketsatanwa na ma ketanla khi, “Anyiza na ha chü nben! ma ma nyon kemayadha nu hi mu nben!”

¹²O APVÜWA, kemeten pi nketsatan nyithu cülo! Ketizensa kebenthu meshen chilo!

¹³Khatinu anyi nketsatanwa na Anyiza nküla ma ketanla ma ccüneng nu hati khiya mehai nu? “Ma mangla kemeten pi hi cü nben.”

¹⁴Isala no muben; no keshüthangla agükeccü, nu ketizenkesa chü nu kiqa cüle kiden ben. Kekiqa nkemiwa ma kahang pi nkwen wi dhachi; no keshüthangla kahhatu nyi kiqaten.

¹⁵Nketsatan nu nkemehai nyithu yasa cülo; mathu nkemehai kekulithu tsü nketeshi chu kemeten pi cülo.

¹⁶Anuphan wila APVÜWA na kadimiwa le. Anyiza kepa wi kinyi ketenthu na ma yyi wina nmila ben.

¹⁷O APVÜWA, no anyi ma satemeni ketenthu kekhie kina cüden; no kempvüza pi mathu cüden.

¹⁸No nyu ma nkekhichi nyi nu magha-maghangthu kiqai kina cüden; no mathu sheipi nu ajühkaghakhi, isanu shü wa keten nyithu paketeqhe nsa neng thsüle kesalina.