Read Northern Rengma Naga ZAKECI 102 Bible Online

ZAKECI 102 - Northern Rengma Naga bible

ZAKECI 102

¹[95] Hi kekhie kina cülo, O APVÜWA, kekiqa ghena hi kiqai ha kina chilo!

²Hi agükeccü wi keben wi, hi wina kheneng bvü nsala! Hi kekhie kina chi, nu hi no ci kechi wi wan hi luneng chilo!

³Hi kahang hana annikekhu ti bhatagha bvü tendha; igwo na anni ti mecang bendha.

⁴aghang keshü ti hi kihhe shadha; kedsakejjü la ndsa mvu ladha.

⁵Hi misikhhali ghadhi; igwo na agü nu ahyu ketan sadha.

⁶Hi ayyi keshü wi awa kesü ti sadha, accüpvü kesü na yasa pi teshi kesa pen wi keben ti sadha.

⁷Hi jenshü meya; hi awa kesü ma ketan ajjenmili wi ka keben ti sadha.

⁸Ghanan thangthang ighinyithu na hi kimenni; hi nankeqhe ketenthu na inyan sen nu kishencü.

⁹N-ghekepvü nu nleben ketsu ghena, ayyiwen pi itsse sadha, nu inyontssü lle pi hi kejjü saghu. No hi piekiya nu pi khala.

¹¹Hi kahang tsüna minulen wi akekhwen tsüti sa; hi aghang keshü ti sadha.

¹²Isala, O APVÜWA, no anuphan kadimiwa; ashüsha tsüdi no meshen den.

¹³No shagha nu Zion nantizen chiden; ma nantizen chi kesa matsü na ghodha; hana matsü kemehai sadha.

¹⁴Ma yasa lela nmaghathu na ma ghaliden; ma yasa nu ma keyasapen wi ben lela, mathu na ma nantizenden.

¹⁵Mizzatentithu na APVÜWA messi den; ayyi wi kedithu tsüdila ma kekhangwa tsü messi den.

¹⁶APVÜWA na Zion kesaneng wi ma kedi pi ccüca chiden.

¹⁷Ma teshi kesa ma nyithu hhai zaya, nu mathu kekhie kina chiden.

¹⁸APVÜWA na mangwa sa chidha khe, ghaketen shüsha ghena zhüyalo, isanu anyi npi kepvüghathu la ma sengya thsüle kesalina.

¹⁹APVÜWA na ma kemetha pen kemisi wina ghang shachi, ma tang wi ben nu ayyi wi ghangchi.

²⁰Ma atssüzüsa kebenthu kaghadhi tsü kina chi, nu shü thsüale meshensa kethengthu tsü lisha chia.

²¹Tsalina ma nyan pi Zion wi thangchi den, nu Jerusalem wi ma seng den.

²²Mizzatentithu nu kadiyyithu na gho saghu, nu APVÜWA kinyile kegho tsü wi tsü.

²³Hi ghanyi keben wina APVÜWA na hi sapi nkhang thsü ladha; ma hi kahangli sapi miludha.

²⁴O Anyiza, hi npi keqhai tuwi khili hi khusen bvü nsa lalo. O APVÜWA, no anuphan hang ben den;

²⁵ No kheni wi ayyi sachi, nu nkwen pi atssanthu la zhüchi.

²⁶Tsüthu tsüna nmilaben, isala no ben den; tsüthu tsüdila athsümeni ti mphi qheaben. Athsümeni ti no mathu pi khala den, nu mathu na nmila ben.

²⁷Isala no tsü keshüthangla makesü, nu no kahang khiela masakhen sa nten.

²⁸Ithu tsangathu na keyazi wi hang den, nu no kekhwe cakhu wi tsü mathu shicüthu na yazishu benyaden.