Read Northern Rengma Naga ZAKECI 103 Bible Online

ZAKECI 103 - Northern Rengma Naga bible

ZAKECI 103

¹[96] APVÜWA senglo, ighamu! Hi kahangli tsüdi, ma nyan kemetha tsü senglo!

²APVÜWA senglo, ighamu, nu ma khatila ccatssü khe tsü nmali la.

³Ma hi kesamithu tsüdila teshi cü, nu hi kesakinaa tsüdila sapi mehai cü.

⁴Ma ashüjjen wina hi hangsha cü, nu kaghali nu nanketizen sawegü pi hi cü.

⁵Ma pala kemehaithu pi hi kahang pong cü, isanu hi ya pvünyi nu amumu ti zü benya thsü.

⁶Nyu ma pasha ketenthu ghena APVÜWA na ajühkaghaten, nu mathu kemeshon tsüpi mathu cüden.

⁷Ma kemeshenthu tsüpi Mosa ccüca, nu Israel nyithu ya ma kekuli kedithu tsü muya thsü.

⁸APVÜWA na nantizen nu ghaliden, ashina nu ma lebentsuten nu ghaliki keten tsüna ma pong ben.

⁹Ma nyu satekü kiben nten, ma anuphan aghepvü nten.

¹⁰Ithu na nmuthu keyishü qe wina ma ithu meten cü nten nyelela ithu kesami nu kesazzithu kutimen khuneng pi ithu cü nten.

¹¹Atssan na ayyi miwi misiki kesa tsüti, ma nyuwakü ketenthu ghena ma kaghali di ntsa.

¹²Nishu na nidu sinu temeja kesa tsüti, ma ithu kesamithu tsü khupi ithu wina temeja cüden.

¹³Aba kesü na ma tsanga tuwi ccatssü kesa tsüti, APVÜWA na ma nyuwakü ketenthu tuwi ccatssü den.

¹⁴Mangwa pi ithu satheng khe ma chüben; anisha pi ithu satheng le kesa ma meshenben.

¹⁵Ithu ghena tsü ithu kahang hana aghangwa ti kesa. Ithu shigü nu mehai pila agheja thighi ti sa den;

¹⁶ciwi ameghü sho pi tsü mo chi, isanu tsüna nmiladen— thola tsü nmu neng laden.

¹⁷Isala APVÜWA nyuwakü ketenthu ghena tsü ma kaghali na anuphanla ben den, nu ma kemehai tsüna ashicü tsüdi wi ben den.

¹⁸Ma ssinu ajühcenketheng wi tsü atsentsa sa ketenthu, nu atsentsa wina ma jühkhukechi nie ketenthu.

¹⁹APVÜWA na ma kadipen pi tangwi chitheng; ma tsüdi miwi kadimiwa.

²⁰APVÜWA senglo, nthu nyilo kezü nu kekhangthu, ma jüh khukechi nie, nu ma mangwa khichi khe kina ketenthu.

²¹APVÜWA senglo, nthu tang wi kahangthu tsüdila, nthu ma maghathu, ma kemeshenwa tsü sa ketenthu tsüdila!

²²APVÜWA senglo, ma kekhang kesen kekhu wi kahangthu tsüdila. APVÜWA senglo, ighamu!