Read Northern Rengma Naga ZAKECI 105 Bible Online

ZAKECI 105 - Northern Rengma Naga bible

ZAKECI 105

¹Nkesengcha sapi APVÜWA cülo, ma kedi pi thangchilo; ma kuli kechithu tsüpi mizzatenti tsüdi kizalo.

²Kesengkhwi sapi APVÜWA wi chilo; Ma amankesa kulikechithu tsüpi khilo.

³Ithu ma ji sakeya ghena nong yalo; ma kinyi ketenthu tsüdila anonghe yalo.

⁴Kekiqa ghena APVÜWA wi walo; nu nhandhila ma kinyilo.

⁵Nthu Abraham shicüthu, ma maghathu; nthu Jacob shicübvüghathu, ma kessikeya nyi: Anyiza na amankesa sa kechithu, nu ma jühkaghaten khukechi tsü meshen yalo.

⁷APVÜWA tsüna ithu Nyiza; ma jühkhukechithu tsüna ayyi tsüdi ghena.

⁸Ma anuphanla cenkethenjüh tsü nie den, ma jühkhukechithu na abvüye hazar kesü ghena.

⁹ Ma Abraham ssinu ajüh cenketheng, nu Isak wi ma jühkhuchiketheng tsü nie den.

¹⁰ APVÜWA na Jacob ssinu cenkethenjüh saya, tsüna anuphanla ben ketenwa tsü.

¹¹Ma khi “Hi Kanaan yyi tsü pi no cüden. Tsüwa tsüna nji saden.”

¹²Anyiza nyithu na keu ketan, mathu na Kanaan yyi wi kijünyi sa.

¹³Mathu na diyyiwa kesü wina kesü wi wa, kadiyyi kesü wina kesü wi wa.

¹⁴ Isala Anyiza na thola ya mathu npasha thsü; [97] mathu khwe cüle kesalina ma npi wina kadimithu kitsanchi.

¹⁵“Hi kessikeya maghathu tsü npatena la; itusenjüh-kechüthu tsü nkidhenla.”

¹⁶ APVÜWA na azeng kesun pi mathu yyi wi chi, nu mathu kedsakejjü tsüdila sen bvüa.

¹⁷ Isala ma mathu tuwi na anyi kesü kesunchi, Josef pi nyu magha ti sa jeü chia.

¹⁸ Amigheli pi ma ccü bhen nu ma sun hu,

¹⁹ma npi wina khi ketheng tsü atsentsa npi kesacen chu. APVÜWA jüh wina ma meshon benle kesa pi chüshiya thsüa.

²⁰ Isanu Ejipt kadimiwa na ma teshi chia; mizzatentithu kekhang kesenthu na ma teshi chia.

²¹ Ma pila kidhan kesenwa sa thsü, nu ma ya ayyi tsüdi miwi kekhang sen thsü,

²²kadimiwa kekhu wi kedithu miwi kekhang sen thsü, nu ma sansichüthu kicükegwelo nu kekhang pi cü.

²³ Isanu Jacob na Ejipt wi wa, nu diyyi tsüwa wi hang wa.

²⁴ APVÜWA na atsanga kejon pi ma nyithu cü, nu mathu ya mathu ghinyi miwi khang kayi yathsü.

²⁵Ma Ejipt nyithu ya ma nyithu n-ghang mvu, nu ma maghathu mechu thsü.

²⁶ Tsasengwi ma maghawa Mosa kesun chi, nu ma kessikeyawa Aaron la.

²⁷Manyi Anyiza kekuli kedi sachi, nu Ejipt wi mankesa kulithu sachi.

²⁸Anyiza na kejang kesun pi diyyiwa wi chi, isala Ejipt nyithu na ma jühkhukechi tsü n-niela.

²⁹ Ma mathu ghaku sapi ajjü ceng thsüa, nu mathu nga tsüdila pathia.

³⁰Akanqaethu yala mathu diyyiwa pong, tsüthu na kadipen la pong ya.

³¹Anyiza na ma jüh khuchi, nu abanzüthu nu abancethu na diyyiwa maben pighe bhon.

³²Ma atsankegho mithon wi aghayi, nu atsancwe kesun pi mathu yyi wi chi;

³³Ma mathu kemeshentsse ton nu khhaghabvü tonthu yasa, nu achantonthu tsüdi pashüa.

³⁴Ma ajüh khuchi nu ashiqa khalatsi si nkeyakhi na gho.

³⁵Tsüthu tsüna ayyi ciwi aghangthu tsüdila dsakhia; tsüthu na yangdsaketen tsüdila dsa.

³⁶Ma Ejipt nyi theghi tsüdi wi atsa tssütsewa pathia.

³⁷Isanu ma Israel nyithu ssinu shhu; mathu na rükatssü nu suna pvüya, nu mathu tsüdila hhanha nu zü.

³⁸Ejipt nyithu na mathu messi, nu mathu bvü kesa ghena mathu nonghe.

³⁹Anyiza na akulukeshü pi ma nyithu ssi, nu anni pi aghaja wi mathu wegü cü.

⁴⁰ Mathu[98] na khie nu ma akvukhithu kesun chi; mathu nonkwen yathsüle kesalina tangwi na atsse pi mathu cü.

⁴¹ Ma alonshi shachi nu atssü na lle shhugho, ayyikeshü wi aghaku ti lle wa.

⁴²Ma ma maghawa Abraham wi ma jühkhishi ketheng kemethawa tsü meshen chi.

⁴³Tsalina ma kessikeya nyithu tsü ssinu shhu, nu mathu akhwisa nu anonkeghe ghena jisha.

⁴⁴ Ma anyi kepa yyi pi mathu cü, nu mathu ya alli tsü yaya thsüa.

⁴⁵Isanu ma nyithu na ma yenthu tsü nie, nu ma jühkhukechi tsüdila kina . APVÜWA senglo!