Read Northern Rengma Naga ZAKECI 108 Bible Online

ZAKECI 108 - Northern Rengma Naga bible

ZAKECI 108

¹[99] Hi nondi ntsa saben, O Anyiza! Hi akhwi sapi no seng den! Shaghalo, ighamu!

²Shaghalo, hi harp nu lair! Hi aghani la pamechü chiden.

³O APVÜWA, hi mizzatentithu jawi no nkesengcha saden. Hi mizzatentithu jawi no seng den.

⁴No ghaliki keten tsüna atssan miwi la misi; njüh tsentsa tsüna akuluthu la cuben.

⁵O Anyiza, atssan wina no kedi, nu n-nyankethang tsüpi ayyi tsüdila ccüca chilo.

⁶No kekhang wina ithu hangsha cülo; hi kekhie luneng cülo, isanu no ghali keten nyi ya hangshaya le kesalina.

⁷Anyiza na ma kekinyijjen wina khichidha, “Khangkeya wina hi Shekhem tsüpi gishü, nu Sukkoth yyiketijü tsüpi inyithu gishüaden.

⁸Gilead tsüna iji, tsüti Manasseh la; Efraim tsüna iliguwen, nu Judah na hi kadi khhatssü.

⁹Isala hi Moab pi ikwenkemetsikhu sa den, nu hi iccüguwen pi Edom miwi cüchiden, tsüwa tsüna hi tsü nkaya kesa zensu. Hi Filistinthu miwi khangkeya ghena jisha den.”

¹⁰O Anyiza, thowa na hi ssinu akhweti vüketheng nyunutiwa wi duya mehai nu? Thowa na hi ssinu Edom wi wa nu?

¹¹No ntsakhiwa ithu meya mvu ladha kwe? No ithu süpahizithu ssinu alentsen nwadha kwe?

¹²Ithu kiqa pi aghinyithu matangya thsülo; anyi kekiqa tsüna ma men nmi le.

¹³Anyiza na ithu wiwa benthu ithu khang yaden; ma ithu ghinyithu miwi khang yaden.