Read Northern Rengma Naga ZAKECI 109 Bible Online

ZAKECI 109 - Northern Rengma Naga bible

ZAKECI 109

¹[100] Hi no seng ben le, Anyiza; ceen nben lalo!

²Gheshighena nu milikemesathu na hi matangben. Mathu na icüki milikemesa khi,

³nu mathu ajjügi nkemi wi hi nkemehai khi nu hi matang.

⁴Hi mathu ghali nu mathu ghena kekhie saten lela, mathu na hi matang den.

⁵Kemehaiwa mithon wi mathu na nkemehai pi hi cü, nu kaghali mithon wi nankemeghü pi hi cüden.

⁶Penthenyi nkemeshon pahan kessi pi ighinyi ghan-nan thsülo, nu ma ghinyithu jawi kesü yala ma kimenni thsülo.

⁷Ma ghan-nan nu ma kesazzi keben mukeyawa sa; ma kekhie tsü la pi ayen kepazzi kesü ti sa thsü kesawa salo!

⁸Ma kahang ya wan cen thsü kesawa salo; anyi kepa ya ma kekuli tsü khuya thsü kesawa salo!

⁹Ma tsangathu yala magha-maghang sa thsü kesawa sa, nu ma wubvü yala denyi thsü kesawa salo!

¹⁰Ma tsangathu ya ajjen nmila kekuwhenyi sa kesawa sa; kededi wi hangkeben wi tsü no mathu jügüshi kesawa salo!

¹¹Ma nyu menpvü kebenthu tsü ya ma tsanqai tsüdila khuya kesawa salo, nu kijünyi thu yala ma kulikechithu tsüdila khuya kesawa salo.

¹²Anyi thola ya ma tuwi keccaketssü nmila kesawa sa, nyelela ma tsanga magha-maghangthu tsü n-nonccala kesawa salo.

¹³Ma shicübvüghathu tsüdila shü thsü kesawa salo, nu ghaketen shüshawa wi tsü ma nyan la mali thsü kesawa salo.

¹⁴APVÜWA ya ma bamyithu nkemehai tsü meshen ketenwa salo, nu khiela ma jja kesamithu tsü teshi pi nkecüwa salo.

¹⁵APVÜWA ya keshüthangla mathu kesami tsü meshen ketenwa salo, isala mathu ketanla mathu malitha sa kesawa salo!

¹⁶Anyi tsüwa tsüna khiela ccatssü le meshen nten; ma haketu, ketha-u, nu kekiqa nkemi nyi tsü meten-mesha nu pathia.

¹⁷Ma nyu kishenkecü tsü ghaliden— ma ya kishen-keshi pvü keyawa salo! Ma sawegü pi nyu kecü tsü n-nanmvu— thola sawegü pi ma nkecüwa salo!

¹⁸Ma athsümeni kepvü ti nyu kishen cüden; ma kishenkecü tsü ya atssü ti ma gwo non wi ghang du thsülo, nu adile ti ma gü non wi ghang du thsülo!

¹⁹Tsüthu tsü ya athsü ti ma whengbhonya thsü, nu keshüthangla ageshi-keqhan qhanpvü keten ti kesawa salo!

²⁰APVÜWA, tsüti ighinyithu meten-mesha cülo— Thowa na nkemehai tsüthu khipi hi shunten khe!

²¹Isala Kemisintsa IPVÜWA, no njüh khishikechi tsüti hi kiqa cülo, nu no kaghali kemehai tsü ghena hi hangsha cülo.

²²Hi ketha-u nu haketu nyi; ileben non ntsa wi hi patena pvüben.

²³Minulen wi akekhwen ti hi nmila wa tendha; pala ghie kesü ti hi mo pi bvü tendha.

²⁴Kekhhwen ghena ikhu na kekhang nmiladha; hi mangla nyedha isala ahyu, nu agü ketan sadha.

²⁵ Anyithu na hi mukeya wi mathu hi nankeqhe; mathu nyu nkenyuwa sala mathu li kejen.

²⁶Hi kiqa cülo, O APVÜWA iNyiza; no ghaliki keten tsü ghena hi hangsha cülo!

²⁷Hi hangsha cü ketenwa tsüna no le kesa ighinyithu yala chüya thsülo.

²⁸Mathu na hi kishencü metsi, isala no hi sawegü cüden. Hi meten-mesha ketenthu ya nyu nchala nu hi nmaghawa ya anonghe keyawa sa thsülo.

²⁹kejüghekeya yala ighinyithu whengbhonya kesawa sa; mathu ya kejüghekeya tsüpi athsümeni kesü ti pvü ketenwa salo.

³⁰Hi misikhhali nu nkesengcha khipi APVÜWA cüden; hi anyithu saghu keben witsü ma seng den,

³¹kepaghenanye ma ketha-uthu sheipi den, nu ma meshensa pi shü thsüale ketenthu wina ma hangsha yaden.