Read Northern Rengma Naga ZAKECI 111 Bible Online

ZAKECI 111 - Northern Rengma Naga bible

ZAKECI 111

¹APVÜWA senglo! Ma nyithu na saghu keben witsü hi ileben tsüdi pi APVÜWA seng den.

²APVÜWA na kulikechithu tsüna khatila amansa nu! Tsüthu nenthi ketenthu tsüdila tsüthu chüshiya mvuthi saden.

³Ma kekuli tsüdi wila kenyuwakü, nu ajenkeben na pong ben; ma ketsatan tsüna anuphan.

⁴APVÜWA na ithu yala ma kekuli amankesathu tsü mali thsü nten; ma ccatssü nu nantizen ntsa.

⁵Ma kedsakejjü pi ma nyuwakü ketenthu cüden; ma khiela cenkethenjüh tsü mali nten.

⁶Ma asangthu yyi tsüpi ma nyithu cü, nu ma kekhang tsüpi ccüca chidha.

⁷Ma kesakepi tsüdi wi ma aleben tsentsa, nu atsentsa tsü sen den; ma jühkhukechi tsüdila nondi qo le.

⁸Tsüthu tsüna asakhen kecu wa den; atsentsa nu ketsatan wina tsüthu tsü khuchi.

⁹Ma ma nyithu lishachi nu anuphan ghena mathu ssinu ajühcen. Kemetha nu kekhangwa tsüna ma le!

¹⁰ APVÜWA kenyuwakü tsüna metsaya keten lenwa; ma kemeshon jühkekaghatenwa tsü khupi ma jühkhukechithu nie ketenthu tsüdila cüden. Anuphanla ma seng keben-u le.