Read Northern Rengma Naga ZAKECI 118 Bible Online

ZAKECI 118 - Northern Rengma Naga bible

ZAKECI 118

¹Keseng pi APVÜWA cülo, kepaghenanye ma mehai, nu ma kaghali tsüna anuphan.

²Israel nyithu yala khi thsülo, “Ma kaghali tsüna anuphan.”

³Anyiza wi keqhaikedithu yala khi thsülo, “Ma kaghali tsüna anuphan.”

⁴Ma kinyi ketenthu tsüdila khi thsülo, “Ma kaghali tsüna anuphan.”

⁵Ihathakina wi hi APVÜWA cichi; ma hi lunengchi nu hi lisha chicü.

⁶ APVÜWA na hi ssiden, hi messi meyacha; Thowa na imiwi mangwa saya mehai nu?

⁷Hi kiqa ketenwa tsüna APVÜWA, nu ighinyithu nyu nchala kesa tsü hi muya den.

⁸Anyi maghaki kesa tsü APVÜWA kenondiwa mehai.

⁹Accülikesathu maghaki kesa tsü APVÜWA kenondiwa mehai.

¹⁰Aghinyithu kejon na hi vüya; isala APVÜWA kekhang wina hi mathu yasa cü!

¹¹Mathu na hi ketekevü tsüdi wi hi vüten ya; isala APVÜWA kekhang wina hi mathu yasa cü!

¹²Mathu na anikhu ti hi vübhon, isala mathu anni na wan aghazüthu mecangkhi kesa ti sa; APVÜWA kekhang wina hi mathu yasa cü.

¹³Mathu na aghepvü ntsa nu hi matang, nu imiwi khangya wa, isala APVÜWA hi kiqa cü.

¹⁴ APVÜWA na hi sapi khang nu zü cü; ma hi hangsha cüdha.

¹⁵Anyiza nyithu na nithsüjjen wi ben, nu khangkeya kenong kejisha tsü kina chilo: “APVÜWA kedi kekhang na ha sachidha!

¹⁶Ma kekhang wina khangkeya sengho ithu cüdha— aghi wi ma kekhang kediwa tsü!”

¹⁷Hi shü kesawa nyela hi hang yaden, isanu APVÜWA na mangwa kulichi khe tsü pi thang chiden.

¹⁸Ma hi meten-mesha ntsa sa, isala ma hi ya shü thsü nsa.

¹⁹Ighena kekinyijjen kaghapeng jenkathu tsü sha chilo; hi ciwi du nu nkesengcha sapi APVÜWA cüten le!

²⁰Hawa ha APVÜWA kaghapeng-jenka tsüle; ketsatan nyi ketan duya mehai.

²¹Hi no seng ben le APVÜWA, no ihhai kina kecü ghena, no khangkeya pi hi kecü ghena.

²² Ajjen kesathu na ma men nmile nu meya mvula kesa alonwa tsüna khili tsü tsüdi jawi la nsenthu keyishü ntsawa sadha.

²³Hawa ha APVÜWA na kulichi; ha ghang pi khatila amansa nu!

²⁴Hawa ha APVÜWA na khangkeya tsathang; ithu anonghe nalo, ithu tsü ghena kemishu sa nalo!

²⁵ Ithu hangsha cülo, APVÜWA, ithu hangsha cülo! Mehaikeya pi ithu cülo, O APVÜWA!

²⁶ Anyiza ya sawegü pi APVÜWA nyan wina keghowa tsü kecüwa salo! APVÜWA Kekinyijjen wina ithu sawegü pi no cü.

²⁷APVÜWA na Anyiza le; ma ithu ghena mehai. aghang tsang khuya nu akho kidenya yilo, nu alentsen sen nu kekinyipen tsü vülo.

²⁸No iNyiza, nu hi keseng pi no cüden; hi no kedi tsüpi thang chiden.

²⁹Nkesengcha sapi APVÜWA cülo, kepaghenanye ma mehai, nu ma kaghali na anuphan.