Read Northern Rengma Naga ZAKECI 135 Bible Online

ZAKECI 135 - Northern Rengma Naga bible

ZAKECI 135

¹APVÜWA seng! Ma nyan senglo, nthu APVÜWA maghathu,

²APVÜWA jjen wi, nu ithu Nyiza Kekinyijjen wi ngan kebenthu.

³APVÜWA senglo, kepaghenanye ma mehai; keseng pi ma nyan sakilo, kepaghenanye ma ccatssü.

⁴Ma ketanla ma ghena Jacob kessiya, Israel nyithu la pi ma ji saya.

⁵Ithu PVÜWA na di nu cenpvüthu kepa tsüdi miwi diki kesa hi chüben.

⁶Ma tang nu ayyi wi mangwa sa mvu ben khe saden, atssükedone nu ma cakhu wila.

⁷Ma ayyi kententhu wina caghamo kulukeshüthu sengho; ma caghamo ghena atsancwe sachi, nu ma kitsanqaipen non wina ameghü sen shhugho.

⁸Ma Ejipt wi anyi nu aghangsa lela, tssütsewa tsüdi pathia.

⁹Ciwi kadimiwa nu ma kekhu kedithu tsüdi meten-mesha cüle ma mankesakulithu, nu amankesathu sachi.

¹⁰Ma mizzatentithu kejon yasa, nu khang ntsa kesa kadimithu pathia:

¹¹Sihon, Amor nyithu kadimiwa, Og, Bashan kadimiwa, nu Kanaan wi kadimithu tsüdi.

¹²Ma mathu yyithu pi ma nyithu cü; ma tsüthu pi Israel cüa.

¹³APVÜWA, no keshüthangla Anyiza le kesa pi thangchi den; ashicü tsüdi wi no meshen ben den.

¹⁴APVÜWA na ma nyithu sheipi den; ma maghawa nantizen chi den.

¹⁵ Mizzatentithu cenpvüthu tsüna rükatssü nu suna pi sa theng; tsüthu tsüna anyi kwen pi kezhü.

¹⁶Mathu apang ben, isala ajüh khiya nten; anyon ben, isala mu nten.

¹⁷Mathu akhuna ben, isala za nten; tsüthu tsüna ahatha la kissa ya nten.

¹⁸Tsüthu sachi nu nondi ketenthu tsüdila mathu na sakechi atsikezhüthu tsüti sa thsü kesawa salo!

¹⁹APVÜWA senglo, Israel nyithu; ma senglo, nthu Anyiza wi keqhaikedithu!

²⁰APVÜWA senglo, Levi nyithu; ma senglo, nthu ma kinyi ketenthu tsüdi!

²¹Zion wi APVÜWA senglo, ma jjen Jerusalem wi. APVÜWA senglo!