Read Northern Rengma Naga ZAKECI 139 Bible Online

ZAKECI 139 - Northern Rengma Naga bible

ZAKECI 139

¹APVÜWA, no hi ketsükepha nu hi chüyadha.

²No hi kekuli tsüdi chüben; no temeja wina hi kemeshenthu tsüdi chüben.

³No hi muben, hi kuli nyelela mnanben lela; no hi kekulithu tsüdi chüben.

⁴Hi npi kekhi wina no hi mangwa khiten khe chüben.

⁵No hi kevü tsüdi wi ben; no no kekhang pi hi khweya.

⁶No hi chükeben tsüna dhu mtsü; tsüna hi meshenshi nkeya ji.

⁷Hi khiewa no kuthi bvüya mehai nu? Hi no ketenpen wina khiewa bvüya mehai nu?

⁸Hi tangwi ki lela no ciwi benla ben; hi keshü yyi wi du lela, na ciwi benla ben.

⁹Keushala hi pighe wa nishu nyelela, lensie ntsa pen nidu wi hang wa lela,

¹⁰no ciwi hi ssi, nu hi kiqa cüle benla metsi.

¹¹Kejang na hi pi kuthi nyelela hi kevü wi kewegü na aghaja salo kesa kiza lela,

¹²isala kejang tsü la nghena njang, nu aghaja tsüna aghanan kewegü ti. kejang nu kewegü tsüna ntu wi makesü.

¹³Igwo nyan kepapa kesa tsüdi no sachi; tsüthu pi ijja pvü non wi saghu chi.

¹⁴Hi no seng, kepaghenanye no kemessi-u; no kekuli tsüna keqhethiketen nu amankesa. Hi ileben tsüdi pi tsü chüben.

¹⁵Igüthu zhütu keben wi ijja pvü non wina kiden-kesha ntsa sa, nu tsüthu saghu cü, kekuthi wina hi dikayi keben wi, no hi ciwi ben le kesa chü—

¹⁶no hi npi kepvügha wina hi mu. atsathang pi hi cü ketheng tsüdi pi nlesüshen wi zhüthengdha, tsüthu kesütanla npi sa keshhu wina.

¹⁷O Anyiza, hi no kemeshenthu tsü muyale kesa khatila dhu nu; ciwi khaju khatila benla ben kalan!

¹⁸Keushala hi tsüthu tsü si lethu, tsüna ahachan miwi la jikayi benla kesa. Hi jencan keshagha wi la no gweghe den.

¹⁹O APVÜWA, gheshighenathu pathi kecü tsü hi khatila nmvu nu! Keyasa nyithu na hi teshi pi hi ketan sa thsü kesa tsü khatila nmvu nu!

²⁰Mathu na gheshighena cüki khi; mathu na nkemehaithu khipi n-nyan shun.

²¹O APVÜWA, hi khatila no nanmeghü ketenthu tsü nanmeghü nu! Hi khatila no shun ketenthu n-nanmvu ten nu!

²²Hi nankemeghü maben pi mathu nanmeghü den; hi mathu pi ighinyithu le saden.

²³O Anyiza, hi ketsükepha nanlo, nu ileben kemeshen chüyalo; hi ghan-nan nu hi kemeshenthu bhashi yalo.

²⁴Bhananlo keushala hi wi nkemehai benla nye khe, nu anuphan len wi tsü ilen tsütsonlo.