Read Northern Rengma Naga ZAKECI 144 Bible Online

ZAKECI 144 - Northern Rengma Naga bible

ZAKECI 144

¹[115] Hi kekhwewa APVÜWA sengle! Ma aghikesa ghena hi sansi cü nu aghi ghena hi kiden-kesha cüden.

²Ma hi kekhwewa nu isheikepiwa, itsonhiwa nu hangshawa, hangshakeya ghena nondi ketenwa tsü. Ma kekhang wina mizzatentithu nka pi ikekhu wi chi.

³ APVÜWA, anyi ha mangwale nu no ma chü, nu anyi melewa tuwi nleben chiten nu?

⁴Ma ameghü kuti kesho ti; ma tsathangthu tsüna aghayen bvü keten tsüti kesa.

⁵O APVÜWA, atssan jjapi nu dugholo; ayikhathu kidhenchi nu tsüthu wina annikekhu shhugho den.

⁶Atsancwe kewegü kesunchi, nu nghinyithu jügüzighe; nlakusüthu pi mathu ga jügülo.

⁷Tang wina dugho atssü kedhu wi hi zanshiya, nu hi hangsha yalo; asangthu kekhang wina hi hangsha yalo,

⁸mathu khiela atsentsawa nkhi nu kekishen kecu wi la milimesa den.

⁹Hi akhwi ketheü pi no saki den, O APVÜWA; hi harp tsü khou nu no saki den.

¹⁰No khangkeya pi kadimithu cüden, nu nmaghawa David hangsha cü.

¹¹Kedaggü nkemehai ighinyithu wina hi hangshaya, asangthu kekhang wina hi hangsha yalo, mathu khiela atsentsawa nkhi nu kekishen kecu wila milimesa den.

¹²Ithu tsathu ya mathu kepvünyi tsüwi aghang na zükeqhe shigü keshagha ti kesawa salo. Ithu ngathu ya zükeqhe keben donbvüthu na kadijjen ccügwenthu sapi atsimehai keten ti kesawa salo.

¹³Asu len kepapa kesa ya ithu sabethu pong kebenwa sa. Ithu llithu wi khaghaneni ya mathu zza hazar tagha ca keyawa sa.

¹⁴Ithu mesüsithu ya ncasa nyelela nbhataghala jikayi shhugho keyawa sa. Ithu lentonti wi ahathakina kiqai nkemiwa sa.

¹⁵Mizzatenti miwi hawa ha atsentsa sakeyawa tsüna kemihhi ntsa; APVÜWA pi mathu Nyiza sakeya nyithu na kemihhi ntsa!