Read Northern Rengma Naga ZAKECI 145 Bible Online

ZAKECI 145 - Northern Rengma Naga bible

ZAKECI 145

¹[116] Hi no kedi pi thangchi den, iNyiza nu kadimiwa; hi anuphan nu anuphanla no nkesengcha saaden.

²Ghanan kaghapen hi no nkesengcha saaden; anuphan nu anuphanla hi no sengden.

³APVÜWA, no di nu misi ntsa, no keseng-u le; no kedi tsüna meshenshiya nben.

⁴No mangwa kulichidha khe tsüna abvüye kesü na wa tsü sengwa kecu no sengden; mathu na no kekhang kekulithu tsüpi thangchiden.

⁵Mathu n-nyankethang nu njenkeben tsü khi, nu hi no amankesa kekulithu tsü meshendhu ben den.

⁶Anyithu na no kekuli kedithu tsü khi, nu hi no kedi tsüpi thangchiden.

⁷Mathu na no kemehai tsü khi, nu no keccaketssü tsü sakiden.

⁸APVÜWA na ghali nu nantizen ntsa, ashina sala ma lebentsu, nu ghaliki keten na ma pong ben.

⁹Ma tsüdi tuwi mehai nu ma sakechithu tsüdi nantizen den.

¹⁰APVÜWA, no sakechithu tsüdi no seng, nu anyithu tsüdi nkesengcha sapi no cüden.

¹¹Mathu na kadimi kekhang nyankethang tsü khi, nu no kezü tsü khiden,

¹²isanu anyi tsüdila no kekuli kedi, nu no kadiyyi jenkeben nyankethang tsü chüyaden.

¹³No kekhang kesen tsüna anuphan, nu no anuphanla kadimiwa. APVÜWA na ma jüh khishi kechi wi tsü atsentsa senden, nu ma kekulithu tsüdi wila nanketizen ketan.

¹⁴Ma agükeccü wi kebenthu tsü kiqa cüden; ma thowa na khuli khe tsü zanki cüden.

¹⁵Kahangli tsüdila nondithi nu no wi ghang den, nu no mathu nsenthu yishü keben wi kedsakejjü pi mathu cüden.

¹⁶No mathu kesen qo pi mathu cü nu nsenthu keyishüthu tsüdi ghena sa cüden.

¹⁷APVÜWA na ma kekulithu tsüdi wi tsatan, ma kekuli tsüdi wi ketizen ketan.

¹⁸Ma ma cichi ketenthu kete wi ben den, thothu na alebenchi nu ma citen khe.

¹⁹Ma ma nyuwakü ketenthu tsü nsenthu keyishü tsüpi cüden; ma mathu kiqai kina nu mathu hangsha cüden.

²⁰Ma ma ghali ketenthu tsüdi khweden, isala ma gheshighenathu yasa cüden.

²¹Hi keshüthang wila APVÜWA senden; ma sakechithu tsüdi anuphanla ma senglo.