Read Northern Rengma Naga ZAKECI 16 Bible Online

ZAKECI 16 - Northern Rengma Naga bible

ZAKECI 16

¹[16] Hi khweyalo, APVÜWA Anyiza! kemessi nkemi wi benyale kesalina hi no nondiden.

²Hi APVÜWA wi kiza, “No IPVÜWA le; hi keben kemehai tsüdila no wina keghole.”

³Anyi APVÜWA wi ben tsentsa saya ketenthu khatila mehai nu! Mathu ssinu gweghe keyawa tsüna ighena anonkekwen ntsawale.

⁴Anyi thowa na acenpvü kepa keka bvü khe ma ketanla aleben kinaa melliyaden. Hi mathu na ahhanshakesa kekinyi witsü mathu gweghe meyacha; hi mathu cenpvüthu tsü la kinyi nben.

⁵APVÜWA, hi keben tsüdiwa tsüna no le, nu no hi nsenthu keyishü tsüdila pi hi cüden; ighena matsü ghaketenwa tsüla nkwen wi benle.

⁶No aju pi hi kecüthu tsüna khatila amansa; tsüthu tsüna khatila mehai nu!

⁷Hi APVÜWA sengben, kepaghenanye ma ilentsütson den, nu aghaja wi lela hi kemeshenwa tsüna hi kitsan ben den.

⁸ Hi keshüthangla APVÜWA na ciwi ben kesa chüben; ma ikete wi ben den nu mangla hi pakuli meyacha.

⁹Tsalina hi inonghe nu ma seng, hi mangla messi meyacha,

¹⁰ kepaghenanye no keshü kekhang wi hi khweden. Hi ileben tsentsa sen nu no kekuli saden, nu no hi teshi pila keshü yyi wi chia nben.

¹¹No kahang lenwa tsü pi hi ccüca; no keben pen wi inonkeghe nu anuphan nonkekwen tsü sengho hi cüden.