Read Northern Rengma Naga ZAKECI 17 Bible Online

ZAKECI 17 - Northern Rengma Naga bible

ZAKECI 17

¹[17] O APVÜWA, kemeshonwa ghena hi kekhie ha kina cülo; hi kekiqa ghena kekhie ha kina cülo! Hi atsentsa kekhie kesa kina cülo.

²No kemeshonwa chü keben ghena, isheikepi jühkaghakhi cüden.

³No ileben chüben. No aghaja hi wi gho; no mehaitsü hi ghan-nan nu imiwi nkemehai kenmvu nkemi tsü muyadha.

⁴Nyu kepathu ti hi nkemehai nkhi; no ayenkhukechithu tsü hi nie, nu nyu keyasa lenwi tsü hi nwa.

⁵Hi keshüthangla nlen tonden, nu khiela tsü cüzzi nten.

⁶Hi no wi khie benle, O Anyiza, no hi kekhie luneng cü keten ghena; tsalina hi wi kheneng gho ijüh kina cülo.

⁷Amankesa kaghaliwa tsü pi hi ccücachi, nu hi hangsha cülo; nkete wi benthu hi nankemeghüthu kemessi nmi.

⁸N-nyonsu ntsawa ti hi noncca cülo; nketsatanthu na hi kematang wi hi pila ngisha kekhu wi kuthi cülo. Hi pathi ya kemehai ighinyithu na hi vüben;

¹⁰mathu nyu ketizen nmi, nu kapvüshüsha ajühkhi den.

¹¹Hi khiewa wa khe mathu hi vüden, matsü kemehai hie nu hi zansha cüle kesalina.

¹²Mathu na ssensitemi ti hi cwen, hi zandhi-zanghe cüle ben.

¹³Gholo, O APVÜWA, Ighinyithu ssikaghashen nu khangyalo! Nketsatanwa kwen wina njünnu pi hi hangsha cülo;

¹⁴kahang hawa wi mathu kenen tsüdi muya kesathu kwen wina hi hangsha cülo. No mathu ghena ketizenkesa saghu ketheng tsüpi mathu meten-mesha cülo; tsüpi mathu tsangathu yala meshumena sa thsü, nu pahan minni pi mathu tsanga tsangathu la cülo!

¹⁵Isala hi no muden, hi kesazzi nkemi lina; nu hi jencan keshagha wi no hi ssi keten tsüna anonkeghe pi hi pong cü.