Read Northern Rengma Naga ZAKECI 18 Bible Online

ZAKECI 18 - Northern Rengma Naga bible

ZAKECI 18

¹[18] Hi khatila no nen nu, APVÜWA! No isheikepiwa.

²APVÜWA na hi kekhwewa; ma ikhweti kezüwa. Anyiza na hi khwe ketenwa, nu ma ssithu hi kemessi nmi. Ma atsonhi ti hi khweden; ma isheipi nu hi pi kemessi nkemi wi chicü.

³Hi APVÜWA cichi, nu ma ighinyithu wina hi hangsha cü. APVÜWA seng!

⁴Keshü kemessi na hi vüya, keyasa hatha na hi kejiya.

⁵Keshü kemessi na hi vüya, nu ashüjjen na ma ca pi hi die.

⁶Igükeccü wi hi APVÜWA cichi; Anyiza wi hi kiqa cülo khie. Ma Kekinyijjen wina ihhai kina cü; hi kiqa cülo kekhie tsü ma yacü.

⁷Tsasengwi ayyiwa na messi nu kuli shagha; ayikha kekitegüpenthu pie kesikuju, Anyiza ma lebentsu kesalina.

⁸Ma mitsan wina annikhu shhugho, ma pang wina anni keqhe, nu amihi kisa shhugho.

⁹Ma atssan jazighe nu akulu kenimegho miwi na dugho.

¹⁰Ma cherubim miwi mbhi ntsa pighe gho; ma ameghü wina gho.

¹¹Ma kejang khupi ma meju pvüya; akulukeshü, atssü na pong keben, ma vüya.

¹²Aghayi nu annicü atsancwe wina ma tuwi gho, nu akulukejang non wina pvükhhi shhugho.

¹³Tsasengwi APVÜWA atssan wina shigüchi; nu kemisi ntsawa hhai zaya.

¹⁴Ma alakusü ga pi ma ghinyithu jügüzighe; atsancwe sapi mathu kesun pi bvü thsü.

¹⁵Atssükedone pen na kiqha, nu ayyi kitegüpen na methasi sa, APVÜWA, no nleben ketsu wi ghamo, nu nghinyithu kha kechi wi.

¹⁶APVÜWA na tang wina dugho hi lapengya; atssü kedhu wina hi zanshiya.

¹⁷Ighinyi kekhang nu hi n-nanmvu ketenthu kwen wina ma hi hangsha cü— mathu na ighena khangzü mtsü.

¹⁸Hi igüccü keben wi mathu hi ssikaghashen, isala APVÜWA na hi khwe cü.

¹⁹Ma kemessi wina hi kiqa cü; ma hi hangsha cü kepaghenanye ma hi nen.

²⁰APVÜWA na ikutimen sa cü kepaghenanye hi kemeshonwa sa; hi kesazzi nkemi ghena ma hi sawegü cü.

²¹Hi APVÜWA yen nieden; hi Anyiza wina bvü nten.

²²Hi ma yen tsüdi nieden; hi ma yenkhukechi n-niela nsa.

²³Hi kesazzi nmi nu nkemehai kekuli wi hi kekheneng den kesa ma chüben.

²⁴Tsalina ma hi kemeshonwa kekuli ghena ikutimen sacü, kepaghenanye hi nsazzi kesa ma chüben.

²⁵O APVÜWA, thowa na ntuwi atsentsa sen khe, no la tsüthu tuwi atsentsa sen den; thowa na ntuwi mehai cencu khe, no tsüthu tuwi mehai cencu den.

²⁶No kemethathu tuwi metha, isala nketsatanthu nanmeghü den.

²⁷No satemeni ketenthu tsü hangsha cü den, isala kekapvüthu satemeni cü den.

²⁸APVÜWA, no kewegü pi hi cü; no hi wi kejang kesun pi bvü thsü.

²⁹Hi nankemeghüthu matangya kemehai kezü, nu mathu chaya kemehai kekhang no pi hi cüle.

³⁰Anyiza hawa ha ma kekulithu na khatila mehai cencu nu! Ma jühkhukechithu tsüna khatila nondi qo nu! Ma wi n-nieyale bha ketenthu tsüdi ghena ma atsonhi ti kesa.

³¹APVÜWA ketan Anyiza; Anyiza ketan ithu sheikepiwa.

³²Ma hi satezü cü ketenwa Anyiza, ma ilen sapi mehai cencu cü den.

³³ Ma iccü sapi ameshü ccü ti sa cü; ayikha wi ma hi noncca cü.

³⁴Ma aghi cho pi hi sansi cü, isanu hi alamugho kezü ntsa senya mehai.

³⁵O APVÜWA, no hi khwe nu hangsha cü; no hi noncca pi di cü, nu no kekhang hi sapi mehaiya thsü.

³⁶Hi ghanya kemehai wi no hi pi noncca cü, nu hi yala nqanca thsü.

³⁷Hi ighinyithu keka wa mathu ghanya; nu hi mathu npi keyasa chu nteshi.

³⁸Hi mathu kihhesha, nu mathu na shagha meyala; mathu khang meyala ituwi khuli.

³⁹Aghi ghena no kezü pi hi cü, nu hi ighinyithu miwi khangya thsüa.

⁴⁰No ighinyithu yala itubvü thsüa; hi ya hi n-nanmvu ketenthu yasa thsüa.

⁴¹Mathu na kekiqa ghena khie, isala thola mathu hangsha ncü; mathu na APVÜWA cichi, isala ma luneng nchi.

⁴²Hi mathu pacha pi ayyinikhu ti sa, nu ameghü na mathu mo sen bvüa. Alen wi anisha tsüti hi mathu cüden.

⁴³Nyu kematangthu kwen wina hi hangsha cü, nu hi yala mizzatentithu miwi kekhang sen thsü; hi nkechü nyithu na khilitsü ikekhu wi hang wadha.

⁴⁴Asangthu na ituwi kukedu; nu mathu na kusi ijüh zaya khe tsü kina .

⁴⁵Mathu kempvüza bhatagha, nu mathu khweti wina messila kenen gho.

⁴⁶APVÜWA hangben! Isheikepiwa seng! Hi hangsha kecüwa Anyiza kedi pi thangchilo.

⁴⁷Ma ighinyithu miwi khangkeya pi hi cü; ma mizzatentithu pi icakhu wi ben thsü,

⁴⁸nu ighinyithu wi hi hangsha cü. O APVÜWA, no hi nankemeghüthu miwi khangkeya pi hi cü, nu nyu yasa ketenthu wi hi khwe cü.

⁴⁹ Tsalina hi mizzatentithu ja wina no seng ben; hi kesengkhwi pi no saki den.

⁵⁰Anyiza na khangkeya kedi pi ma kadimiwa cü; anuphanla ma ghaliki kesa tsüpi ma kessi keyawa ccüca, tsüna David nu ma shicübvüghathu.